ورلڈ ٹی ٹوئنٹی فائنل: امپائرز اور میچ ریفریز کے ناموں کا اعلان
Apr ۰۲, ۲۰۱۶ ۱۱:۲۸ Asia/Tehran
آئی سی سی یا انٹرنیشنل کرکٹ کونسل نے مینز اور ویمنز ورلڈ ٹی ٹوئنٹی کے فائنل میچ کے لئے امپائرز اور میچ ریفریز کے ناموں کا اعلان کر دیا۔
ذرائع کے مطابق پاکستان کے علیم ڈار ویمنز فائنل سُپروائز کریں گے۔ ورلڈ ٹی ٹوئنٹی کے فائنلز اتوار کو کولکتہ کے ایڈن گارڈنز میں ہوں گے، ویمنز فائنل، تین مرتبہ کی چیمپئن آسٹریلیا اور پہلی بار فائنل کھیلنے والی ویسٹ انڈیز کی ٹیم کے درمیان ہو گا۔
اس میچ کے لئے اینڈی پائی کرافٹ ریفری ہوں گے جبکہ پاکستان کے علیم ڈار اور انگلینڈ کے رچرڈ النگورتھ فیلڈ امپائر ہوں گے، نائجل لونگ کو تھرڈ امپائر مقرر کیا گیا ہے۔
ویسٹ انڈیز اور انگلینڈ کے درمیان ہونے والے مینز فائنل کا میچ ریفری، رنجن مدوگالے کو مقرر کیا گیا ہے، فیلڈ امپائرنگ کے فرائض روڈ ٹکر اور کمار دھرماسینا انجام دیں گے، تھرڈ امپائر ماریسس اریسمس ہوں گے۔
