ورلڈکپ کرکٹ میں آج بنگلہ دیش اورافغانستان آمنے سامنے
ورلڈکپ کرکٹ 2019کے اہم میچ میں کل پاکستان نے جنوبی افریقا کو 49 رنز سے شکست دے دی۔
ورلڈ کپ کرکٹ میں آج بنگلہ دیش اورافغانستان کی ٹیمیں آمنے سامنے ہو رہی ہیں۔ جبکہ اس سے قبل کل کھیلے گئے ورلڈکپ کے اہم میچ میں پاکستان نے جنوبی افریقا کو 49 رنز سے شکست دے دی اورایونٹ میں اپنی دوسری فتح حاصل کرلی۔
ٹاس جیت کر پاکستان کی جانب سے اننگز کا آغاز فخر زمان اور امام الحق نے کیا، دونوں اوپنرز نے پر اعتماد انداز میں اننگز کا آغاز کیا اور 81 رنز کی شراکت قائم کی تاہم فخرزمان 44 رنز بناکر عمران طاہر کی گیند پر کیچ آؤٹ ہوگئے، کچھ ہی دیر بعد عمران طاہر نے امام الحق کا زبردست کیچ لیکر انہیں بھی پویلین بھیج دیا۔
محمد حفیظ صرف 20 رنز ہی بناسکے تاہم ون ڈاؤن آنے والے بابراعظم اور حارث سہیل نے شاندار کھیل کا مظاہرہ کیا، دونوں کھلاڑیوں کے درمیان 81 رنز کی شراکت قائم ہوئی جس کے بعد بابراعظم 69 رنز بناکر آؤٹ ہوگئے۔
شعیب ملک کی جگہ ٹیم میں شامل ہونے والے حارث سہیل نے جارحانہ کھیل کا مظاہرہ کیا جب کہ اماد وسیم نے بھی ان کا بھرپور ساتھ دیتے ہوئے 71 رنز کی شراکت قائم کی تاہم اماد وسیم 23 رنز بناکر آؤٹ ہوگئے۔ حارث سہیل نے شاندار کھیل کا مظاہرہ کیا اور صرف 58 گیندوں پر 89 رنز بنائے، حارث سہیل کی جارحانہ اننگز کی بدولت پاکستان نے مقررہ 50 اوورز میں 7 وکٹوں کے نقصان پر 308 رنز بنائے۔
نیوزی لینڈ کے اوپنر ہاشم آملہ پہلے ہی اوور میں 2 رنز بنا سکے، ابتدائی نقصان کے بعد کپتان ڈوپلیسی اور ڈی کوک نے محتاط انداز میں اننگز کو آگے بڑھایا اور 87 رنز کی پارٹنرشپ قائم کی تاہم 47 کے انفرادی اسکور پر ڈی کوک کیچ آؤٹ ہوگئے جب کہ 103 کے مجموعے پر شاداب خان نے مارکرم کو بولڈ کردیا۔ کپتان ڈوپلیسی کو محمد عامر نے 63 رنز پر چلتا کیا۔
پانچویں وکٹ پر ڈیوڈ ملر اور وینڈر ڈوسن نے جم کر بیٹنگ کرتے ہوئے 53 رنز کی پارٹنر شپ قائم کی اور مجموعے کو 189 تک پہنچایا مگر ایک بار پھر شاداب خان نے اس خطرے کو ٹالتے ہوئے ڈوسن کو پویلین کی راہ دکھا دی جب کہ اگلے ہی اوور میں جارح مزاج ڈیوڈ ملر کو شاہین آفریدی نے بولڈ کردیا، جس کے بعد وہاب ریاض نے کرس مورس، رباڈا اور اینگنڈی کو آؤٹ کردیا، جنوبی افریقا مقررہ 50 اوورز میں 9 وکٹوں پر 248 رنز ہی بنا سکی۔
پاکستان کی جانب سے وہاب ریاض اور شاداب خان نے 3،3 جب کہ محمد عامر نے 2 اور شاہین آفریدی نے ایک کھلاڑی کو آؤٹ کیا۔ پاکستانی ٹیم کی جیت میں 89 رنز بنا کر کلیدی کردار ادا کرنے والے حارث سہیل کو میچ آف دی میچ کا ایوارڈ دیا گیا۔
