امریکہ: ریاست ٹینسی کے جنگلات میں بھیانک آگ
امریکی ریاست ٹینسی کے جنگلات میں آگ لگنے کے نتیجے میں ہزاروں افراد بے گھر ہو گئے ہیں۔
رپورٹ کے مطابق امریکی ریاست ٹینسی کے جنگلات میں آگ لگنے کی وجہ سے وہاں کے لوگ اپنا گھربار چھوڑنے پر مجبور ہو گئے ہیں ۔ رپورٹوں میں بتایا گیا ہے کہ آگ بجھانے کے لئے فائربریگیڈ عملے کی تمام تر کوششوں کے باوجود ہوا کے تیز جھونکوں سے آگ مزید بھڑکتی چلی گئی اور دیکھتے ہی دیکھتے پورے علاقے کو آگ نے اپنی لپیٹ میں لے لیا۔
آگ بھڑکنے کی بناء پر سیکڑوں کی تعداد میں رہائشی مکانات اور عمارتیں جل گئیں جبکہ بچ نکلنے والے افراد کو اپنے لواحقین اور رشتہ داروں کی سلامتی کے بارے میں گہری تشویش لاحق ہے۔ دوسری جانب ریاست میسوری کے شہر کنزاس کے مقامی حکام کا کہنا ہے کہ کنزاس کے بین الاقوامی ایئرپورٹ کے قریب پیلیٹ کاؤنٹی کے علاقے میں گیس پائپ لائن میں شدید دھماکہ ہوا جس میں کوئی جانی نقصان تو نہیں ہوا تاہم دھماکے کے بعد شدید آگ بھڑک اٹھی۔ ابھی تک دھماکے کی وجہ نہیں بتائی گئی ہے۔
