جنوبی کوریا میں امریکی میزائل نظام کی تنصیب کے خلاف مظاہرے
جنوبی کوریا میں امریکی میزائل نظام کی تنصیب پر کڑی نکتہ چینی کی جا رہی ہے۔
جنوبی کوریا میں امریکہ کے میزائل نظام کی تنصیب کے خلاف مظاہرے جاری ہیں اورمقامی افراد اور جنوبی کوریا کی حزبِ اختلاف کا مؤقف ہے کہ اس نظام کی تنصیب سے شمالی کوریا کو حملے کی دعوت دے دی گئی ہے جس سے جنوبی کوریا میں رہنے والوں کی زندگیاں خطرے میں پڑ گئی ہیں۔
جنوبی کوریا میں ’’تھاڈ‘‘ کی تنصیب پر چین نے بھی سخت احتجاج کیا ہے کیونکہ اس نظام کے ریڈار سے چین کے فوجی آپریشن کی سیکیوریٹی کے لیے مسائل پیدا ہوسکتے ہیں۔
گزشتہ روز دو امریکی بمبار طیاروں نے جنوبی کوریا کی فضائیہ کے ساتھ ایک جنگی مشق میں بھی حصہ لیا البتہ امریکی فوج کے مطابق یہ معمول کی مشقیں تھیں۔
واضح رہے کہ امریکی فوج کا کہنا ہے کہ جنوبی کوریا میں اس کا میزائل ڈیفنس سسٹم تھاڈ ابتدائی طور پر فعال ہوگیا ہے یعنی اب یہ حملہ آور میزائل کو تباہ کرنے کےلیے تیار ہے۔
اس متنازعہ میزائل ڈیفنس سسٹم کی تنصیب جنوبی کوریا میں گزشتہ ہفتے شروع کی گئی تھی جسے جزوی طور پر فعال کردیا گیا تاہم اس کے مکمل آپریشنل ہونے میں مزید چند ماہ لگ جائیں گے۔
