فلپائن، منشیات فروشوں کے خلاف آپریشن 32 ہلاک 107 گرفتار
فلپائن میں سیکیورٹی فورسز نے منشیات فروشوں کے خلاف آپریشن کے دوران 32 افراد کو ہلاک اور 107 کو گرفتار کر لیا ہے۔
غیر ملکی خبر رساں ایجنسی کے مطابق فلپائن میں منشیات فروشوں کے خلاف آپریشن کا سلسلہ جاری ہے، گزشتہ روز پولیس کے خفیہ اہلکاروں نے دارالحکومت منیلا کے جنوب میں واقع صوبے بولا کان میں بھیس بدل کر منشیات حاصل کرنے کی کوشش کی اور جب ڈرگ ڈیلرز آئے تو سیکیورٹی فورسز نے انہیں گھیر لیا، ملزمان نے فائرنگ کرتے ہوئے فرار ہونے کی کوشش کی جس پر فورسز اور منشیات فروشوں کے درمیان فائرنگ کا تبادلہ ہوا اور 32 ڈرگ ڈیلرز مارے گئے۔
فلپائن کے صدر روڈ ریگو دوترتے نے جون 2016 میں عہدہ سنبھالنے کے بعد سے منیشات فروشوں اور اسے استعمال کرنے والوں کے خلاف اعلان جنگ کر رکھا ہے اور اب تک منشیات کے خلاف کیے جانے والے سیکڑوں آپریشنز میں 3400 کے قریب اسمگلرز اور نشے کے عادی افراد کو ہلاک کیا جا چکا ہے۔
