شمالی کوریا کی دو اہم شخصیات پر امریکی پابندیاں عائد
Dec ۲۷, ۲۰۱۷ ۱۰:۲۸ Asia/Tehran
امریکا نے شمالی کوریا کے میزائل پروگرام سے منسلک دو حکام پر نئی پابندیاں عائد کر دی ہیں۔
غیر ملکی خبر ایجنسی کے مطابق امریکی محکمہ خزانہ نے شمالی کوریا کے 2 اعلیٰ ترین حکام کم جونگ سک اور ری پیونگ چول کو پیانگ یانگ کے میزائل پروگرام کے اہم کردار قرار دیتے ہوئے ان پر پابندیاں عائد کردی ہیں۔
پابندیوں کے نتیجے میں اب دونوں افراد امریکا میں کسی قسم کی بھی مالی لین دین نہیں کر سکیں گے اور اگر ان کے امریکا میں کوئی اثاثے ہوئے تو انھیں بھی منجمد کرلیا جائے گا۔
واضح رہے کہ 2017 کے دوران شمالی کوریا نے ایٹم بم کے علاوہ کئی بیلسٹک میزائلوں کے بھی کامیاب تجربات کئے ہیں، اقوام متحدہ نے بھی شمالی کوریا پر نئی پابندیاں عائد کی تھیں تاہم شمالی کوریا نے اسے مسترد کرتے ہوئے ‘جنگی اقدام’ قرار دیا تھا۔
