ترکی میں قبل از وقت عام انتخابات
ترکی کے صدر رجب طیب اردوغان نے ترکی میں ڈیڑھ سال قبل ہی عام انتخابات کرانے کا اعلان کیا ہے۔
غیر ملکی خبر رساں ادارے کے مطابق ترک صدر طیب اردوغان نے صدارتی محل میں اپوزیشن پارٹی ’نیشنل موومنٹ پارٹی‘ کے سربراہ ڈیوٹ باہچلی سے ملاقات کی جس کے بعد انہوں نے ملک میں قبل از وقت انتخابات کروانے کا اعلان کرتے ہوئے کہا کہ اپوزیشن رہنما سے مشاورت کے بعد ترکی میں پارلیمانی اور صدارتی انتخابات مقررہ وقت سے تقریباً ڈیڑھ سال قبل 24 جون کو کرانے کا فیصلہ کیا گیا ہے ۔
البتہ ترکی میں دیگر اپوزیشن جماعتوں کا ملک میں نافذ ایمرجنسی ختم کرنے کا مطالبہ کرتے ہوئے کہنا تھا کہ ایمرجنسی کی حالت میں انتخابات نہیں ہوسکتے۔
واضح رہے ترکی میں جولائی 2016 کی ناکام بغاوت کے بعد سے ایمرجنسی نافذ کی گئی تھی جو اب تک برقرار ہے اور ناکام بغاوت کے بعد ترکی میں اپوزیشن کے خلاف بڑے پیمانے پر کریک ڈاون شروع ہوا جو بدستور جاری ہے۔
