امریکی صدر ٹرمپ کو ایک اور جھٹکا
Jul ۱۰, ۲۰۱۸ ۱۱:۴۳ Asia/Tehran
امریکہ کی ریاست کیلیفورنیا میں وفاقی عدالت کی جج نے غیر قانونی تارکین وطن کے بچوں کو طویل مدت حراست میں رکھنے کی درخواست مسترد کر دی۔
امریکا کے صدر ڈونلڈ ٹرمپ کو ایک اور جھٹکا اس وقت لگا جب وفاقی جج نے غیر قانونی تارکین وطن کے بچوں کو طویل مدت حراست میں رکھنے کی درخواست مسترد کر دی۔
کیلیفورنیا میں وفاقی عدالت کی جج ڈولی گی نے جسٹس ڈیپارٹمنٹ کی درخواست مسترد کر دی، جسٹس ڈیپارٹمنٹ نے انیس سو ستانوے کے ایک قانون میں ترمیم کی درخواست کی تھی تاکہ غیر قانونی تارکین وطن کے بچوں کو اپنے والدین کے ساتھ جیل میں رکھا جا سکے۔
جج کا کہنا ہے اس وقت کسی جیل میں ایسی سہولتیں نہیں ہیں جہاں والدین اور بچوں کو ایک ساتھ رکھا جا سکے۔
واضح رہے کہ ٹرمپ کے اس فیصلے کے خلاف زبردست احتجاجی مظاہرے بھی ہوئے تھے۔
