پاکستان اور روس کے وزراء خارجہ کے مابین کشمیر کی صورتحال پر گفتگو
پاکستان کے وزیرخارجہ نے اپنے روسی ہم منصب سے ٹیلیفونی رابطہ کر کے ہندوستان کے زیر انتظام کشمیر کی موجودہ صورتحال پر گفتگو کی۔
پاکستانی ترجمان دفتر خارجہ کے مطابق وزیرخارجہ شاہ محمود قریشی نے روسی ہم منصب سرگئی لاروف کو ٹیلی فون کیا اور ہندوستانی حکومت کی طرف سے اٹھائے گئے یکطرفہ اقدامات کے بارے میں بریفنگ دی۔
ترجمان کا کہنا ہے کہ شاہ محمود قریشی نے روسی وزیرخارجہ کو کشمیر کی موجودہ صورتحال سے آگاہ کرتے ہوئے کہا کہ جموں و کشمیر سے متعلق ہندوستان کے اقدامات اقوام متحدہ کی سلامتی کونسل کی قراردادوں اور بین الاقوامی قوانین کے خلاف ہیں جب کہ ہندوستانی اقدامات سے امن و سلامتی کے لئے سنگین خطرات لاحق ہیں۔
ترجمان کے مطابق اس موقع پر روسی وزیر خارجہ سرگئی لاروف کا کہنا تھا کہ روس صورتحال پر گہری نظر رکھے ہوئے ہے، روسی وزیرخارجہ نے پرامن طریقے سے مذاکرات کے ذریعے تمام تصفیہ طلب مسائل کے حل کی اہمیت پر زور دیا جب کہ دونوں رہنماوٴں نے خطے میں امن اور استحکام کے لئے مل کر کام جاری رکھنے پر اتفاق کیا۔
