SAHAR

سی این این کی رپورٹ کے مطابق جنرل قاسم سلیمانی کے قتل کی توجیہ میں صدر ٹرمپ کے دعوؤں کے برخلاف امریکی سفارت خانوں کی سیکورٹی حکام نے اعلان کیا ہے کہ امریکی سفارت خانوں کو فوری خطرہ در پیش نہیں تھا۔ 

سی این این نے اپنی رپورٹ میں مزید کہا ہے کہ بغداد میں امریکی سفارتخانے کے سیکورٹی افسر نے کہا ہے کہ اس سفارتخانے کو فوری طور پر کسی خطرے کی کوئی رپورٹ نہیں ملی تھی۔

سی این این نے اپنی رپورٹ میں کہا ہے کہ امریکی سفارتخانے خاص طور سے مغربی ایشیا میں معمولا حملوں کا نشانہ بنتے رہتے ہیں لیکن کسی بھی سفارت خانے کے لئے کوئی سنگین یا فوری خطرہ موجود ہونے کی صورت میں امریکی وزارت خارجہ واضح طور پر سیکورٹی الرٹ جاری کرتی ہے۔

رپورٹ میں کہا ‏گیا ہے کہ ٹرمپ نے جن چار سفارت خانوں کے لئے خطرے کی بات کی ہے ان کے سلسلے میں اس طرح کا کوئی انتباہ یا الرٹ جاری نہیں کیا گیا ہے۔ 

دوسری جانب ایم ایس این بی سی ٹی وی نے رپورٹ دی ہے کہ ایسے قرائن و شواہد موجود ہیں جن سے پتہ چلتا ہے کہ صدر ٹرمپ نے اپنے مواخذے کے خوف سے جنرل قاسم سلیمانی کے قتل کا فرمان جاری کیا ہے۔ 

ایم ایس این بی سی ٹی وی چینل نے اپنی ایک رپورٹ میں کہا ہے کہ سپاہ پاسداران انقلاب اسلامی کے قدس بریگیڈ کے کمانڈر جنرل قاسم سلیمانی کی شہادت پر منتج ہونے والے ڈرون حملے کے بارے میں وائٹ ہاؤس کی جاری کردہ رپورٹ پر اب کوئی بھی یقین نہیں کرے گا۔