تلخ اور حسین یادوں کے ساتھ 2022ء کا آخری سورج رو بہ غروب ہوا
تلخ اور حسین یادوں کے ساتھ 2022ء کا آخری سورج آج غروب ہو رہا ہے اور پھر کل ایک نئے سال 2023 کے آغاز کے ساتھ افق پر نمودار ہوگا۔
سحر نیوز/دنیا: آج 2022 کا آخری سورج بہت سی کامیابیوں، ناکامیوں اور تبدیلیوں کو دامن میں سمیٹے غروب ہو جائیگا۔ سال 2022ء کئی ایسے واقعات کے ساتھ رخصت ہو رہا ہے جو آنے والے برسوں پر بھی اپنے دور رس اثرات مرتب کریں گے۔
سال 2022ء جنگ، امن، سیاست، سماج اور عالمی معیشت کے شعبوں میں کئی اہم واقعات اپنے ساتھ لے کر اور کورونا کی تباہ کاریوں کے ساتھ اختتام پذیر ہو رہا ہے۔
اس سال جہاں بہت کچھ اچھا ہوا، وہیں عروج و زوال کی بے شمار داستانیں بھی رقم ہوئیں، جو آنے والے بہت سے دنوں تک موضوع گفتگو بنی رہیں گی۔ اسی طرح 2022 ء کا سورج عالمی افق پر کئی قابل ذکر تبدیلیاں لا کرغروب ہونے جا رہا ہے۔
شاعر نے اس موقع پر کیا خوب کہا ہے؛
ڈھلی جو شام نظر سے اتر گیا سورج
ہوا کسی نے اڑا دی کہ مر گیا سورج
اسلامی جمہوریہ ایران میں رسم ہے کہ جب وہاں گردش لیل و نہار ایک سال کے اختتام کے بعد نئے برس کی جانب بڑھ رہی ہوتی ہے تو سبھی ایک معنیٰ اور مخصوص دعا پڑھتے ہیں۔ وہ دعا کچھ اس طرح ہے کہ:
’’اے دلوں اور نظروں کو منقلب کرنے والے، اے شب و روز کی تدبیر کرنے والے، اے حالات بشر اور برسوں کو تبدیل کرنے والے، ہمارے حال کو بہترین حال میں تبدیل فرما دے!
