اسپین فرانس کو ہرا کر یورو کپ کے فائنل میں
یورو کپ 2024 کے پہلے سیمی فائنل میں اسپین نے فرانس کو 2-1 سے شکست دے کر ایونٹ کے فائنل کے لیے کوالیفائی کرلیا۔
سحرنیوز/دنیا: میونخ میں کھیلےگئے اس سیمی فائنل میں فرانس نے آٹھویں منٹ میں ہی گول کرکے برتری حاصل کر لی لیکن اس کی یہ برتری زیادہ دیر برقرار نہ رہ سکی اور اسپین کے سولہ سالہ کھلاڑی لامین یمل نے اکیسویں منٹ میں شاندار گول کر کے فرانس کی برتری کا خاتمہ کر دیا۔ اسپین نے فرانس پر دباؤ کا سلسلہ جاری رکھا اور پچیسویں منٹ میں اس کے کھلاڑی اڈینیئل اولمو نے دوسرا گول کر کے اسپین کو دو ایک کی برتری دلا دی۔ پہلا ہاف دو ایک سے اسپین کے حق میں رہا۔
دوسرے ہاف میں دونوں ٹیموں نے گول کرنے کی بھرپور کوشش کی لیکن کامیاب نہ ہو سکیں اور اس طرح اسپین نے فرانس کو دو ایک سے شکست دے کر فائنل کے لیے کوالیفائی کر لیا۔
یورو کپ کا دوسرا سیمی فائنل انگلینڈ اور ہالینڈ کے درمیان کھیلا جائے گا۔
