پاکستان: اہم دہشت گرد سرغنہ احسان سنڑے ساتھیوں سمیت ہلاک
پاکستان کےشمالی اور جنوبی وزیرستان کے سرحدی علاقے گڑیوم میں سیکیورٹی فورسز کے آپریشن کے دوران کئی دہشت گرد کارروائیوں کا ماسٹر مائنڈ اپنے 3 ساتھیوں سمیت ہلاک ہوگیا۔
آئی ایس پی آر کی جانب سے جاری بیان کے مطابق شمالی اور جنوبی وزیرستان کے سرحدی علاقے گڑیوم میں سیکیورٹی فورسز نے دہشت گردوں کی موجودگی کی اطلاع پر کارروائی کی۔ اس دوران اہم دہشت گرد کمانڈر احسان سنڑے اپنے 3 ساتھیوں سمیت ہلاک ہوگیا۔
احسان سنڑے دہشت گردی کی کئی وارداتوں کا ماسٹر مائنڈ تھا، اس کے علاوہ وہ ٹارگٹ کلنگ اوراغوا برائے تاوان میں بھی ملوث تھا۔ احسان سنڑے حال ہی میں شکتو کےعلاقے میں دہشت گرد کارروائیوں میں ملوث تھا، ان حملوں میں لیفٹیننٹ ناصر اور کیپٹن صبیح سمیت پاکستانی فوج کےکئی اہلکار جاں بحق ہوئے تھے، احسان سنڑے دہشتگردی کے دیگر مقدمات میں بھی سی ٹی ڈی پولیس کومطلوب تھا۔