SAHAR

عالمی مالیاتی فنڈ آئی ایم ایف نے مشرق وسطی کے علاقے میں تیل برآمد کرنے والے ممالک کے لیے تیل کی قیمت میں کمی سے دو ہزار سولہ میں ہونے والے ممکنہ نقصان کا تخمینہ چار سو نوے سے پانچ سو چالیس ارب ڈالر تک لگایا ہے۔

ایسوسی ایٹڈ پریس کی رپورٹ کے مطابق مشرق وسطی اور وسطی ایشیا میں آئی ایم ایف کے ڈائریکٹر مسعود احمد نے کہا ہے کہ مشرق وسطی میں تیل برآمد کرنے والے ممالک کو دو ہزار پندرہ میں تیل کی قیمت میں کمی کی وجہ سے تین سو نوے ارب ڈالر کا نقصان ہوا۔ انھوں نے کہا کہ تیل کی قیمت میں کمی جاری رہنے کا مطلب، اس علاقے کے ملکوں خاص طور پر سعودی عرب جیسے ملکوں، کہ جن کا اقتصاد ابھی تک تیل کے پیسے سے بہت زیادہ وابستہ ہے، کے بجٹ خسارے میں اضافہ اور اقتصادی ترقی کی رفتار میں کمی ہے۔

اس رپورٹ کے مطابق سعودی عرب کا بہتر فیصد بجٹ تیل کی فروخت سے حاصل ہوتا ہے اور امکان ہے کہ رواں سال اسے نوے ارب ڈالر کے خسارے کا سامنا کرنا پڑے گا۔

آئی ایم ایف کی رپورٹ میں اسی طرح یہ بھی کہا گیا ہے کہ دو ہزار پندرہ میں خلیج فارس تعاون کونسل کے رکن ملکوں کی اقتصادی ترقی کی اوسط شرح تین اعشاریہ تین فیصد رہی جو رواں سال کم ہو کر ایک اعشاریہ آٹھ فیصد ہو جائے گی۔

اس رپورٹ میں توقع ظاہر کی گئی ہے کہ دو ہزار سولہ میں ایران کی داخلی ناخالص پیداوار میں اضافہ چار فیصد اور دو ہزار سترہ میں تین اعشاریہ سات فیصد رہے گا۔