SAHAR

بہار میں انتہا پسندی سے متاثر بانکا ضلع کے آنندپور پولیس آؤٹ پوسٹ علاقے کے جنگل میں دیر رات گئے پولیس اور نکسلیوں کے درمیان ہوئے تصادم میں نکسلی کمانڈر منٹو خیرا مارا گیا۔

پولیس سپرنٹنڈنٹ راجیو رنجن نے بتایا کہ ممنوعہ کمیونسٹ پارٹی آف انڈیا (ماؤنواز) کے انتہا پسندوں کے خلاف پلوا جنگل میں اسپیشل ٹاسک فورس (ایس ٹی ایف) اور مقامی پولیس کی طرف سے سرچ آپریشن چلایا جا رہا تھا کہ راہ میں گھات لگائے بیٹھے انتہا پسندوں نے سرچ ٹیم پر فائرنگ شروع کر دی ۔

انہوں نے کہا کہ پولیس نے بھی جوابی فائرنگ کی جس میں مذکورہ نکسلی کمانڈ مارا گیا۔ مسٹر رنجن نے بتایا کہ پولیس نے جائے وقوعہ سے ایک اے کے 47 اور دو انساس رائفل برآمد کیں۔ انہوں نے بتایا کہ تصادم میں متعدد انتہا پسند زخمی ہوئے ہیں جنہیں ان کے ساتھی لے کر جنگل میں فرار ہو گئے۔