ھندوستان کے بارے میں عالمی سوچ مثبت ہے،وزیراعظم مودی
ہندوستان کے وزیر اعظم نریندر مودی نے اتوار کے روز من کی بات میں کہا ہے کہ عالمی سطح پر ہندوستان کو اب ایک الگ نظر سے دیکھا جا رہا ہے۔
ہندوستان کے میڈیا ذرائع کے مطابق وزیر اعظم نریندر مودی نے اپنے ملک کے قومی نشریاتی ادارے سے من کی بات کرتے ہوئے کہا ہے کہ ہندوستان کے بارے میں دنیا کی سوچ بدلی ہے اور پوری دنیا ہندوستان کی ترقی کو دیکھتے ہوئے ان کے ملک میں سرمایہ کاری کے نتائج سے پرامید ہو رہی ہے۔
انھوں نے ہندوستان میں ترقیاتی کاموں کا ذکر کرتے ہوئے کہا ہے کہ میک ان انڈیا کا عمل اب تیز ہوتا جا رہا ہے۔ نریندر مودی نے کہا کہ ڈاکٹر امبیڈگر نے انڈسٹریل سپر پاور کی صورت میں ہندوستان کا جو خواب دیکھا تھا ان کو امید ہے وہ پورا ہو گا۔ انھوں نے صحت کے بارے میں بھی کہا کہ دو ہزار پچّیس تک ہندوستان سے ٹی بی کا خاتمہ ہو جائے۔ ہندوستان کے وزیر اعظم نے کہا کہ ملک میں تعلیمی نظام مزید بہتر بنائے جانے کی کوشش کی جا رہی ہے۔
