SAHAR

ہندوستانی پارلیمنٹ کے ایوان زیریں لوک سبھا میں کانگریس کے لیڈر ادھیر رنجن چودھری نے جمعرات کو پارلیمنٹ کے احاطے میں صحافیوں سے بات چیت کرتے ہوئے کہا کہ حکومت پارلیمنٹ میں بحث کے دوران کانگریس کی آواز کو دبانا چاہتی ہے اس لئے اس کے سات اراکین کو معطل کیا گیا ہے۔

انھوں نے کہا کہ یہ حکومت کا فیصلہ ہے اور یہ فیصلہ کتنا غلط ہے یہ ملک کے عوام طے کریں گے۔ انھوں نے کہا کہ اپوزیشن دہلی کے فسادات پر پارلیمنٹ میں بحث کا مطالبہ کررہی ہے لیکن اس کے اس مطالبے کو مسلسل نظر انداز کیا جارہا ہے۔

قابل ذکر ہے کہ جمعرات کو لوک سبھا کی کارروائی تین بار ملتوی ہونے کے بعد تین بجے دوبارہ شروع ہوئی تو حکومت نے بغیر بحث کے ہی ایک بل منظور کرانے کے کوشش کی جس پر کانگریس کے اراکین نے دوبارہ ہنگامہ شروع کردیا۔

اس درمیان بعض کانگریسی اراکین پارلیمان وزیر داخلہ امت شاہ کے استعفے کا مطالبہ کرتے ہوئے اسپیکر کی چیئر کے پاس پہنچ گئے اور میز سے کاغذات اٹھاکے پھاڑ دیئے۔

صدر نشین ڈپٹی اسپیکر میناکشی لیکھی نے کانگریسی ممبران پارلیمنٹ کی اس حرکت کو قابل افسوس بتایا۔ پارلیمانی امور کے وزیر پرہلاد جوشی کے کہنے پر ان سبھی کانگریسی ممبران پارلیمنٹ کو موجودہ بجٹ اجلاس کی پوری مدت کے لئے معطل کرنے کی تجویز پیش کی جو صوتی ووٹوں سے پاس ہوگئی۔