ہندوستانی پارلیمنٹ کے دونوں ایوانوں میں ہنگامہ آرائی
ہندوستانی پارلیمنٹ کے دونوں ایوانوں میں حزب اختلاف کے اراکین کی ہنگامہ آرائی کا سلسلہ منگل کو بھی جاری رہا ۔
ہندوستان کی سرکاری نیوز ایجنسی یو این آئی کے مطابق اپوزیشن پارٹیوں کے اراکین کی ہنگامہ آرائی کی وجہ سے ایوان بالاراجیہ سبھا کی کارروائی منگل کو دوبار ملتوی ہوئی۔
رپورٹ کے مطابق ضروری دستاویزات ایوان کی میز پر رکھے جانے کے بعد چیئرمین ایم ونکیا نائیڈو نے ضابطہ دو سو سڑسٹھ کے تحت دیے گئے نوٹس کو مسترد کرنے کا اعلان کیا۔
اس کے بعد راجیہ سبھا میں قائد حزب اختلاف ملک ارجن کھڑگے کھڑے ہوئے اور انھوں نے کچھ کہنا چاہا۔ اس کے ساتھ ہی کانگریس اور دیگر اپوزیشن جماعتوں کے ارکان نے اپنی نشستوں سے اونچی آواز میں بولنا شروع کر دیا جس سے شور مزید بڑھ گیا۔
اس کے بعد چیئرمین نے ایوان کی کارروائی دو بجے تک کے لئے ملتوی کرنے کا اعلان کیا۔
رپورٹ کے مطابق ایوان زیریں لوک سبھا میں حزب اختلاف کے اراکین کی ہنگامہ آرائیوں کے باعث منگل کو کارروائی معمول کے مطابق نہ چل سکی۔
یاد رہے اپوزیشن پارٹیوں کے ارکان گزشتہ کئی دنوں سے اپنے بارہ ارکان کی معطلی منسوخ کرنے کا مطالبہ کررہے ہیں۔
