ہندوستان کے مشہور و معروف کرکٹرمحمد سمیع تک پہنچی ایس آئی آر کی آنچ، نوٹس ہوا جاری
ہندوستان کے مشہور و معروف کرکٹرمحمد سمیع اور ان کے بھائی کو ’ایس آئی آر‘ معاملہ میں الیکشن کمیشن نے نوٹس جاری کر دیا ہے۔
سحرنیوز/ہندوستان: کرکٹر محمد سمیع کو کولکاتہ کے جادوپور کے ایک اسکول میں ووٹر لسٹ کی خصوصی گہری نظر ثانی (ایس آئی آر) کی تصدیق سے متعلق سماعت کے لئے پیر (5 جنوری) کو طلب کیا گیا تھا لیکن وہ راجکوٹ میں وجے ہزارے ٹرافی میں بنگال کی جانب سے کھیلنے کے سبب سماعت میں شامل نہیں ہو سکے۔ افسران نے منگل کو بتایا کہ محمد سمیع اور ان کے بھائی محمد کیف دونوں کو اس سماعت کے لیے بلایا گیا تھا۔ سمیع نے الیکشن کمیشن سے نئی تاریخ دینے کی گزارش کی ہے، جسے قبول کر لیا گیا ہے۔ اب سماعت 9 جنوری سے 11 جنوری کے درمیان ہوگی۔
واضح رہے کہ محمد سمیع کولکاتہ میونسپل کارپوریشن کے وارڈ نمبر 93 کے ووٹر ہیں، جو راس بہاری اسمبلی حلقہ کے تحت آتا ہے۔
مغربی بنگال کے چیف الیکٹورل دفتر کے ایک افسر نے بتایا کہ سمیع اور ان کے بھائی کے ذریعہ پُر کیے گئے فارم میں کچھ غلطیاں پائی گئی تھیں۔ اسی وجہ سے دونوں کو نوٹس بھیج کر سماعت کے لیے بلایا گیا تھا۔ حالانکہ محمد سمیع اترپردیش کے رہنے والے ہیں لیکن اپنے کرکٹ کیریئر کی وجہ سے وہ کئی سال سے کولکاتہ میں رہ رہے ہیں۔ وہ کم عمر میں ہی کولکاتہ آگئے تھے اور یہاں بنگال کے سابق رنجی کپتان سمبرن بنرجی کی رہنمائی میں تربیت حاصل کی۔ اس کے بعد انہوں نے بنگال کی انڈر-22 ٹیم میں جگہ بنائی۔
ہمیں فالو کریں:
Follow us: Facebook, X, instagram, tiktok whatsapp channel
واضح رہے کہ یہ پورا معاملہ مغربی بنگال میں جاری ووٹر لسٹ کی خصوصی گہری نظر ثانی (ایس آئی آر) مہم کے درمیان سامنے آیا ہے۔ اس مہم کے تحت ووٹر لسٹ کو درست کیا جا رہا ہے۔ اس عمل میں کئی مشہور شخصیات کو بھی عام ووٹرس کی طرح نوٹس جاری کیے گئے ہیں۔ محمد سمیع کے علاوہ اداکار اور ترنمول کانگریس کے رکن پارلیمنٹ دیو، اداکار جوڑے لابونی سرکار اور کوشک بندیوپادھیائے کے نام بھی سامنے آئے ہیں جنھیں نوٹس جاری کیا گیا ہے یا سماعت کے لیے بلایا گیا ہے۔
انتخابی افسران کا کہنا ہے کہ ایس آئی آر مہم کا مقصد ووٹر کے ریکارڈ کو بہتر کرنا اور اسے مکمل طور سے درست بنانا ہے۔ اس عمل میں تمام ووٹر، خواہ وہ عام لوگ ہوں یا عوامی زندگی سے منسلک افراد ہوں، سرٹیفکیشن قوانین کی تعمیل کرنے کی ضرورت ہے۔
