ایوان میں منصوبہ بند تعطل جمہوریت کے لیے مناسب نہیں ہے: ہندوستان میں لوک سبھا کے اسپیکر کا بیان

Jan ۲۱, ۲۰۲۶ ۱۹:۱۹ Asia/Tehran

ہندوستان میں لوک سبھا کے اسپیکر اوم برلا نےکہا ہے کہ ایوان میں بار بار خلل اور منصوبہ بند تعطل ملک کی جمہوریت کے لیے مناسب نہیں ہے

سحرنیوز/ہندوستان: لوک سبھا کے اسپیکر اوم برلا نے کہا کہ جب ایوان کی کارروائی متاثر ہوتی ہے تو سب سے زیادہ نقصان اس عام شہری کا ہوتا ہے، جس کے مسائل پر بحث ہونی ہوتی ہے۔

انہوں نے واضح طور پر کہا کہ خلل نہیں بلکہ مکالمے اور گفت و شنید کی روایت کو مضبوط کرنا وقت کی اہم ضرورت ہے-

ہمیں فالو کریں:

انہوں نے زور دیتے ہوئے کہا کہ ریاستی اسمبلیوں میں ایک سال کے دوران کم از کم تیس دن اجلاس ہونا ضروری ہے تاکہ عوامی توقعات اور خواہشات کو مؤثر پلیٹ فارم مل سکے۔

انہوں نے کہا کہ جمہوریت میں عوام سب سے بالاتر ہیں اور عوامی نمائندوں کی جواب دہی صرف انتخابات کے وقت نہیں بلکہ ہر دن اور ہر لمحہ ہوتی ہے۔

پریزائیڈنگ افسران کے کردار پر روشنی ڈالتے ہوئے اوم برلا نے کہا کہ وہ صرف کارروائی چلانے والے نہیں ہوتے بلکہ آئین کے محافظ اور جمہوری اقدار کے نگہبان ہوتے ہیں۔

ان کی غیر جانبداری، حساسیت اور مضبوطی ہی ایوان کی سمت طے کرتی ہے۔انہوں نے مزید کہا کہ قانون سازی کے لیے دستیاب وقت اور وسائل کے تخلیقی اور مؤثر استعمال پر زور دیا گیا ہے تاکہ جمہوری ادارے عوام کے تئیں زیادہ جواب دہ بن سکیں۔