SAHAR

رہبر انقلاب اسلامی نے امریکی صدر ٹرمپ کی تازہ ترین دھمکیوں اور ایران مخالف بیانات کو انتہائی پست اور گھٹیا قرار دیتے ہوئے فرمایا کہ میں ایرانی عوام کی طرف سے ٹرمپ سے یہ کہنا چاہتاہوں کہ مسٹر ٹرمپ تم کچھ نہیں بگاڑ سکتے۔

رہبر انقلاب اسلامی نے یوم معلم کی مناسبت سے یونیورسٹیوں کالجوں اور اسکولوں کے اساتذہ اور ثقافتی شخصیات سے ملاقات میں اپنے خطاب کے دوران فرمایا کہ سب نے کل رات دیکھا کہ امریکی صدر ٹرمپ نے ایران کے سلسلے میں کس قدر پست اور گھٹیا الفاظ کا استعمال کیا اور اس کی باتوں میں دس سے زائد جھوٹ واضح طور پر دیکھے جا سکتے تھے-

رہبر انقلاب اسلامی نے فرمایا کہ ٹرمپ نے اسلامی نظام کو بھی دھمکی دی اور ایرانی عوام کو بھی ڈرانے اور دھمکانے کی کوشش کی لیکن میں ایران کے عوام کی طرف سے یہ کہتا ہوں کہ مسٹر ٹرمپ تم کچھ بھی نہیں بگاڑ سکتے-

  رہبرانقلاب اسلامی نے فرمایا کہ امریکی صدر کا بے ادبانہ اور گھٹیا رویّہ ہمارے لئے غیر متوقع نہیں تھا ہم نے پہلے دن سے کہا تھا کہ امریکا پر اعتماد نہیں کیا جا سکتا-

رہبر انقلاب اسلامی نے فرمایا کہ جس وقت ایٹمی معاملہ اٹھایا گیا تھا تو اسی وقت میں نے صراحت کے ساتھ کہا تھا کہ ایران کے ساتھ امریکا کی عداوت اور دشمنی ایٹمی انرجی سے مربوط نہیں ایٹمی معاملہ محض بہانہ ہے، اسلامی جمہوریہ ایران سے امریکا کی دشمنی اور مخالفت کی وجہ یہ ہے کہ ایران پر امریکا کا مکمل تسلط تھا لیکن اسلامی انقلاب نے اس کا ہاتھ کاٹ دیا-

آپ نے فرمایا کہ اب علاقے میں ایران کے اثر و رسوخ اور ایران کے میزائل پروگرام کو مسئلہ بنا کر پیش کیا جا رہا ہے اور بالفرض اگر اس کو بھی مان لیں تو بھی امریکا نہیں رکے گا وہ کوئی اور مسئلہ اٹھا دے گا- 

رہبر انقلاب اسلامی نے ایران کے اسلامی جمہوری نظام اور ایرانی عوام کی شان میں امریکی صدر کی گستاخیوں اور دریدہ دہنی کا ذکر کرتے ہوئے فرمایا کہ اس طرح کی حرکت ہمارے لئے خلاف توقع نہیں تھی، امریکا کے سابق صدور بھی ہر دور میں اپنے اپنے اعتبار سے ایسی ہی گستاخیاں کرتے رہے ہیں لیکن ایرانی عوام ہر دور میں پوری قوت کے ساتھ ڈٹے رہے-

رہبر انقلاب اسلامی نے فرمایا کہ سبھی امریکی صدور خاک میں مل گئے اور ان کی ہڈیاں بھی گل گئیں لیکن اسلامی جمہوریہ ایران بدستور مضبوط و توانا ہے اور یہ موجودہ امریکی صدر بھی خاک میں مل جائے گا اور اس کا جسم سانپ اور کیڑے مکوڑوں کی خوراک بن جائے گا لیکن اسلامی جمہوری نظام پائیدار باقی رہے گا-

آیت اللہ العظمی سید علی خامنہ ای نے خلیج فارس کے علاقے کے بعض عرب ملکوں کے نام ٹرمپ کے حالیہ خط کا ذکر کرتے ہوئے فرمایا کہ ٹرمپ نے لکھا تھا کہ میں نے تم لوگوں کے لئے سات ٹریلین ڈالر خرچ کئے ہیں اس لئے اب تمہیں اس کا عوض دینا ہو گا-

رہبر انقلاب اسلامی نے امریکا کو خطاب کرتے ہوئے فرمایا کہ تم نے سات ٹریلین ڈالرعراق اور شام پر قبضہ کرنے کے لئے خرچ کیا تھا لیکن تم ایسا نہیں کر سکے اس میں دوسروں کا کیا قصور؟-

آپ نے ملک کی ترقی و پیشرفت کے لئے ایٹمی توانائی کی ضرورتوں پر تاکید کرتے ہوئے فرمایا کہ ایٹمی توانائی ملک کی ضرورت ہے اور توانائی کے شعبے کے ماہرین کے مطابق آئندہ چند برسوں میں ایران کو بیس ہزار میگاواٹ ایٹمی بجلی کی ضرورت ہو گی اس لئے ایٹمی توانائی کا حصول ہمارے لئے بیحد ضروری اور اہم ہے-

رہبر انقلاب اسلامی نے فرمایا کہ ان تمام ضرورتوں کے باوجود ہم نے ایٹمی معاہدے کو تسلیم کیا لیکن ایران سے امریکا کی دشمنی ختم نہیں ہوئی-

آپ نے فرمایا کہ میں نے پہلے دن سے کہا تھا کہ امریکا پر بھروسہ نہیں کیا جا سکتا اور اگر کوئی معاہدہ کرنا ہے تو ضروری ضمانت حاصل کر لی جائے اور معاہدے پر امریکی صدر سے دستخط کرائے جائیں-

رہبر انقلاب اسلامی نے ایرانی حکام کو مخاطب کرتے ہوئے فرمایا کہ اگر باقی تین یورپی ملکوں سے بھی ایٹمی معاہدے کے تعلق سے کچھ طے کرنا ہے تو اس کی عملی ضمانت لینی ہو گی بصورت دیگر یہ بھی امریکا ہی والا کام کریں گے کیونکہ یہ تین ممالک بھی قابل اعتماد نہیں ہیں اور ان پر بھی بھروسہ نہیں کیا جا سکتا-

رہبر انقلاب اسلامی نے زور دے کر فرمایا کہ اگر ان تین یورپی ملکوں سے حتمی ضمانت نہیں لی جا سکتی تو پھر ایٹمی معاہدے کو آگے نہیں بڑھایا جا سکتا۔