ایران کی فضا مردہ باد امریکہ و اسرائیل کے نعروں سے گونج اٹھی
آج اسلامی جمہوریہ ایران کے غیورعوام نےعالمی یوم القدس ریلیوں میں بھرپورطریقے سے شرکت کر کے ایک بار پھر نئی تاریخ رقم کی۔
آج رمضان المبارک کے با برکت مہینے کا آخری جمعہ ہے جسے جمعۃ الوداع کہا جاتا ہے اور بانی انقلاب اسلامی حضرت امام خمینی (رح) نے فلسطینیوں سے یکجہتی اور عالمی خونخوار اسرائیل سے اظہار نفرت و بیزاری کیلئے اس دن کو عالمی یوم القدس کا نام دیا ہے۔ اس دن کی مناسبت سے دنیا بھرکی طرح ایران کے تمام چھوٹے بڑے شہروں میں عالمی یوم القدس کی ریلیوں کا انعقاد کیا گیا جن میں کروڑوں فرزندان اسلام نے مردہ باد امریکہ مردہ باد اسرائیل کے نعروں کے ساتھ فلسطینیوں کے ساتھ یکجہتی کا اظہار کیا۔
ایران بھر سے موصول ہونے والی رپورٹوں کے مطابق، کروڑوں افراد نے جن میں تمام شعبہ ہائے زندگی سے تعلق رکھنے والے شہری تھے آج جمعہ کے روز عالمی یوم القدس کی ریلیوں میں شریک ہوئے ۔
ایران کی غیرتمند قوم نے ہر سال کی طرح اس سال کی یوم القدس ریلیوں میں تاریخ رقم کردی جہاں انہوں نے فلسطینیوں کی حمایت جاری رکھنے کا اعادہ کیا ۔
تہران سمیت تمام صوبوں اور اہم شہروں میں روزہ داروں نے گرم موسم کے باوجود ریلیوں میں بھر پور شرکت کی اور مقبوضہ فلسطین میں صہیونیوں کی جاری جارحیت اور ان مظالم کی پشت پناہی کرنے والے ممالک بالخصوص بعض علاقائی ممالک کی شدید مذمت کی ۔
کروڑوں ایرانی عوام کے ساتھ ساتھ صدر مملکت اوراعلی سیاسی اور عسکری شخصیات اور حکام بھی مختلف شہروں میں لوگوں کے رنگ میں رنگ گئے اور فلسطین کی حمایت پر اپنے عزم کا اعادہ کیا ۔
ایرانی عوام نے اتحاد امت کے خلاف سازش کرنے والے بعض علاقائی ممالک اور عالمی طاقتوں کی مذمت کرتے ہوئے کہا کہ دنیا بھر کے مسلمان فلسطینوں سے متعلق ڈیل آف سنچری کی سازش کو ناکام بنادیں ۔
