SAHAR

جاپان میں تعینات ایران کے سفیر نے کہا ہے کہ وزیراعظم شنزو ابے کا آئندہ دورہ تہران دونوں ملکوں کے قریبی تعلقات میں ایک اہم سنگ میل ثابت ہوگا

جاپان میں تعینات اسلامی جمہوریہ ایران کے سفیر مرتضی رحمانی موحد نے پیر کے روز ارنا سےگفتگو کرتے ہوئے جاپان کے وزیراعظم کے آئندہ دورہ ایران کی اہمیت  پر روشنی ڈالتے ہوئے کہا کہ ایران جاپان تعلقات تاریخی اور مضبوط ہیں اور آئندہ دورے سے دونوں ممالک کے باہمی تعلقات اور تعاون مزید فروغ پائیں گے.

ایرانی سفیر نےکہا کہ خطے میں امن اور کشیدگی کا خاتمہ ایران کی اصولی پالیسی ہے، جاپان کے ایران اور امریکہ سے اچھے تعلقات ہیں لہذا ہم کشیدگی کے خاتمے کے مقصد سے ہر موثر کوشش کا ساتھ دیں گے.

رحمانی موحد کا کہنا تھا کہ امریکہ نے یکطرفہ اور غیرقانونی اقدامات کے ذریعے مشرق وسطی میں کشیدگی میں اضافہ کیا ہے، خلیج فارس میں امریکہ کی بڑھتی ہوئی فوجی موجودگی نے بھی اس صورتحال کو پیچیدہ کیا ہے لہذا ہم ہر اس کوشش کا جس سے امریکی مداخلت میں کمی ہو خیرمقدم کرتے ہیں.

انہوں نے اس بات پر زور دیا کہ ہمیں مشترکہ خدشات کے خاتمے اور خلیج فارس کے ممالک سے بات چیت کے لئے امریکہ کی کوئی ضرورت نہیں تاہم جاپان کی اپنی اہمیت ہے اور ہم سمجھتے ہیں کہ وہ اس لحاظ سے موثر کردار ادا کرسکتا ہے.

ایرانی سفیر نے کہا کہ ایرانی تیل کی خریداری سے متعلق جاپانی حکومت کے ساتھ مذاکرات جاری ہیں اور ہمیں امید ہے کہ جاپان کی جانب سے تیل خریداری کے سلسلے کا پھر سے آغاز ہوگا.

واضح رہے کہ جاپان کے وزیر اعظم کا دورہ تہران عالمی سطح پر توجہ کا مرکز بنا ہوا ہے، جاپان کے وزیر اعظم شینزوآبے  کے دورہ تہران کو ایران اور امریکہ کے درمیان ثالثی کے تناظر میں دیکھا جارہا ہے انقلاب اسلامی کی کامیابی کے بعد کسی بھی جاپانی وزیر اعظم کا ایران کا  یہ پہلا دورہ ہے۔

جاپان کے وزیر اعظم کے تہران اور واشنگٹن کے ساتھ گہرے دوستانہ تعلقات ہیں، جاپان کے وزیر اعظم شینزوآبے بدھ کے دن تہران کا دورہ کریں گے ۔ جاپانی وزیر اعظم تہران اور واشنگٹن کے درمیان ثالثی کا کردار ادا کرنا چاہتے ہیں۔

جاپان کو دنیا کے تیسرے بڑے اقتصاد کے عنوان سےبھی جانا جاتا ہے جاپان کو انرجی درآمد کرنےکی سخت ضرورت ہے ۔ ٹوکیو اپنی انرجی کا 80 فیصد حصہ مشرق وسطی سے پورا کرتا ہے لہذا وہ بھی خطے میں جنگ اور کشیدگی کا خواہاں نہیں ہے ۔