ملک کی سلامتی اور استحکام پر تاکید؛ ایران کی مسلح افواج کے سربراہ میجر جنرل محمد باقری
میجر جنرل محمد باقری نے کہا کہ 46ویں یوم آزادی کے موقع پر ایران کے اسلامی نظام کی طاقت اور اس کے استحکام کا دنیا بھر میں بول بالا ہوگیا ہے۔
سحرنیوز/ایران: ایران کی مسلح افواج کے سربراہ میجر جنرل محمد باقری نے خاتم الانبیا دفاعی سینٹرل کمان کے نئے سربراہ کی تقرری کے پروگرام سے خطاب کرتے ہوئے کہا کہ مسلح افواج کی دفاعی اور جنگی طاقت سے، ملک کی سلامتی اور استحکام کی ضمانت فراہم ہوتی ہے۔ انہوں نے کہا کہ 46ویں یوم آزادی کے موقع پر ایران کے اسلامی نظام کی طاقت اور اس کے استحکام کا دنیا بھر میں بول بالا ہوگیا ہے۔
میجر جنرل محمد باقری نے کہا کہ ایران کے خلاف 8 سالہ جنگ اور دہشت گردانہ اقدامات سمیت دشمنوں کی مختلف سازشوں کے باوجود، مسلح افواج نے مختلف شعبوں میں اپنا لوہا منوا لیا جس کا نتیجہ اسلامی جمہوریہ ایران کی مستحکم دفاعی طاقت کی شکل میں سامنے آگيا ہے۔
انہوں نے کہا کہ اسلامی انقلاب سے قبل ایران کا دفاعی نظام 90 فیصد تک دیگر ممالک سے وابستہ تھا لیکن اب نہ صرف زیادہ تر شعبوں میں خودکفیل ہوچکے ہیں بلکہ دیگر ممالک کو فوجی مصنوعات برآمد بھی کر رہے ہیں۔
چیف آف اسٹاف جنرل باقری نے کہا کہ مسلح افواج اپنی اندرونی صلاحیتوں اور نوجوان افرادی قوت کی بناپر اس قدر ترقی کرچکی ہیں کہ اسلامی جمہوریہ ایران کے دشمنوں کو عزیز ملک کی جانب ترچھی نظروں سے دیکھنے تک کی اجازت نہیں دیں گی۔
