طوفان الاقصی نے اسرائیل کے وجود کو خطرے میں ڈال دیا: ایرانی اسپیکر
ایران کی پارلیمنٹ کے اسپیکر محمد باقر قالیباف نے حماس اعلی وفد سے ملاقات کے دوران طوفان الاقصی آپریشن کو تاریخ کا رخ بدلنے والا ایک اہم موڑ قرار دیا۔
سحر نیوز/ ایران: اسلامی جمہوریہ ایران کی پارلیمنٹ کے اسپیکر محمد باقر قالیباف نے حماس کے اعلی سطحی وفد سے ملاقات میں کہا کہ طوفان الاقصی نے صیہونی حکومت کے وجود کو خطرے میں ڈال دیا۔ طوفان الاقصی تاریخ بدلنے والا ایک اہم موڑ تھا۔ صیہونیوں نے 75 سال تک اپنی بقا اور ناقابل تسخیر ہونے کا تاثر دینے کی کوشش کی، تاہم خدا کی مرضی سے اس آپریشن میں ان کی حکمت عملی اور حربے مکمل طور پر ناکام ہو گئے۔
انہوں نے کہا کہ صیہونی حکومت فلسطین اور غزہ کو تاریخ سے مٹانا چاہتی تھی لیکن الحمدللہ، آج غزہ اور فلسطین کے عوام نے ثابت کردیا کہ مقاومت زندہ ہے۔
اس موقع پر حماس کے وفد کے سربراہ محمد درویش نے کہا کہ جنگ بندی کا معاہدہ صیہونی ریاست کی شکست کے سوا کچھ نہیں۔
انہوں نے کہا کہ ہمیں خوشی ہے کہ یہ ملاقات ایسے وقت میں ہو رہی ہے جب ہم دو بڑی کامیابیوں کے قریب ہیں ایک اسلامی انقلاب کی سالگرہ اور دوسری وہ کامیابی جو ہم نے صہیونی حکومت کے خلاف حاصل کی ہے۔
محمد درویش نے کہا کہ فلسطینی مزاحمت نے ایک طویل راستہ طے کیا ہے، اور ہمارے عوام کئی دہائیوں سے جدوجہد کر رہے ہیں۔ اس تمام عرصے کے باوجود وہ آج بھی اپنی استقامت کے اعلی ترین درجے پر قائم ہیں اور ان شاء اللہ، اسی حوصلے اور استقلال کے ساتھ فلسطین کی آزادی کو یقینی بنائیں گے۔
محمد درویش نے کہا کہ فلسطینی مزاحمت کا سلسلہ ہم نے 40 سال پہلے شروع کیا اور اسلامی جمہوریہ ایران نے مقاومت کی بیج بونے میں انتہائی اہم کردار ادا کیا ہے۔
قابل ذکر ہے کہ اس ملاقات سے قبل حماس کی قیادتی کونسل کے چیف محمد درویش کے ہمراہ تحریک حماس کے سیاسی دفتر کے سربراہ خلیل الحیہ اور مغربی کنارے میں حماس کے سربراہ زاہر جبارین نے تنظیم کے دیگر اراکین کے ہمراہ رہبر انقلاب اسلامی سے ملاقات کی۔
