تفسیر تسنیم مکتب تشیع اور حوزہ علمیہ کے باعث افتخار ہے: رہبرانقلاب اسلامی
رہبر انقلاب اسلامی آیت اللہ العظمی سید علی خامنہ ای نے تفسیر تسنیم کو مکتب تشیع اور حوزہ علمیہ کے باعث افتخار قرار دیتے ہوئے فرمایا ہے کہ حوزہ علمیہ میں قرآن کی تفسیر پر ضرورت کے مطابق کام نہیں ہوا ہے۔
سحرنیوز/ایران: مہر خبر رساں ایجنسی کی رپورٹ کے مطابق، رہبر انقلاب اسلامی آیت اللہ العظمی سید علی خامنہ ای نے آیتاللہ جوادی آملی اور ان کے تحقیقی گروہ کی کاوشوں کو سراہتے ہوئے تفسیر تسنیم کو شیعہ مکتب فکر اور حوزہ علمیہ کے لیے باعثِ افتخار قرار دیا۔ تفسیر تسنیم بین الاقوامی کانفرنس کے منتظمین کی جانب سے کی جانے والی ملاقات کے دوران رہبر انقلاب اسلامی آیت اللہ العظمی سید علی خامنہ ای نے فرمایا کہ حوزہ علمیہ ، آیت اللہ جوادی آملی کی چالیس سالہ علمی اور تفسیری کاوشوں کا مقروض ہے۔ آیتاللہ جوادی آملی کی علوم عقلیہ، فقہ، فلسفہ اور عرفان میں خدمات بے حد اہم اور قابل ستائش ہیں۔ ان کی قرآنی تفسیر کی حیثیت ان تمام علمی کارناموں سے کہیں برتر ہے۔
رہبر انقلاب اسلامی آیت اللہ العظمی سید علی خامنہ ای نے تفسیر تسنیم کو شیعہ مکتب اور حوزہ علمیہ کے لیے فخر کا باعث قرار دیتے ہوئے اس کی خصوصیات پر روشنی ڈالی اور فرمایا کہ یہ تفسیر تفسیر المیزان سے مشابہ ہے اور زیادہ جدید، وسیع اور علمی نکات سے بھرپور ایک جامع انسائیکلوپیڈیا کی حیثیت رکھتی ہے۔آپ نے حوزہ ہائے علمیہ میں تفسیر قرآن پر کم توجہی پر افسوس کا اظہار کرتے ہوئے علامہ طباطبائی کو حوزہ علمیہ میں تفسیری علوم کی ترویج کا بانی قرار دیا۔رہبر انقلاب اسلامی آیت اللہ العظمی سید علی خامنہ ای نے فرمایا کہ قم کے حوزہ علمیہ میں تقریباً ۲۰۰ دروس تفسیر کا انعقاد ایک خوش آئند پیش رفت ہے اور اس رجحان کو مزید مضبوط اور مستحکم کرنا چاہیے۔واضح رہے کہ تفسیر تسنیم آیتاللہ جوادی آملی کی اسّی جلدوں پر مشتمل ایک عظیم قرآنی تفسیر ہے، جو ۴۰ سالہ تحقیقی و تدریسی تجربے اور متعدد محققین کی شب و روز کی محنت کا نتیجہ ہے۔ یہ "تفسیر قرآن بہ قرآن" کے زمرے میں آتی ہے، اور اس کی تفسیری روش چند بنیادی مراحل پر مشتمل ہے جن میں آیت کی تفصیل، باریک نکات و اشارے اور روایات کی روشنی میں تفسیر شامل ہے۔
