عالمی توانائی ایجنسی کے ڈپٹی ڈائریکٹر تہران کا دورہ کریں گے
ایران کی ایٹمی توانائی ایجنسی کے ترجمان کہا کہ بین الاقوامی ایٹمی توانائی ایجنسی کے ڈپٹی ڈائریکٹر مزید بات چیت کے لیے آئندہ دو ہفتوں کے اندر تہران کا دورہ کریں گے
سحرنیوز/ایران: ایران کی ایٹمی توانائی ایجنسی کے ترجمان بہروز کمال وندی نے کہا کہ بین الاقوامی ایٹمی توانائی ایجنسی کے ڈپٹی ڈائریکٹر مزید بات چیت کے لیے آئندہ دو ہفتوں کے اندر تہران کا دورہ کریں گے۔
انہوں نے کہا کہ ان کا یہ دورہ آئی اے ای اے کے ڈائریکٹر جنرل گروسی کے حالیہ دورہ ایران کے بعد طے ہوا ہے جو تہران اور اقوام متحدہ کے جوہری نگراں ادارے کے درمیان جاری تکنیکی تعاون کے سلسلے میں ہوگا۔
کمال وندی نے کہا کہ گروسی کے نائب مختلف امور کا جائزہ لینے کے لیے تہران آنے والے ہیں۔واضح رہے کہ آئی اے ای اے کے سربراہ بدھ کے روز دو روزہ سرکاری دورے پر تہران پہنچے جہاں وزیر خارجہ عباس عراقچی اور ایرانی ایٹمی ایجنسی کے سربراہ محمد اسلامی سے ملاقاتوں کے بعد تہران سے ویانا کے لیے روانہ ہوئے۔
