SAHAR

لیبیا کے ذرائع نے اعلان کیا ہے کہ نامعلوم جنگی طیاروں نے سرت شہر اور اس کے اطراف کے علاقوں میں داعش کے ٹھکانوں پر حملے کئے ہیں

لیبیا کی بوابہ الوسط نیوز ویب سائٹ نےسرت شہر میں مقامی ذرائع کے حوالے سے خبردی ہے کہ نامعلوم جنگی طیاروں نے الظہر کے علاقے میں جو سرت شہر سے بیس کلومیٹرکے فاصلے پر واقع ہے دہشت گرد گروہ داعش کے ٹھکانوں پر حملے کئے ہیں - ان حملوں میں فجر لیبیا نامی شدت پسند تنظیم سے وابستہ النھرکیمپ کو بھی جہاں داعش نے اپنے ٹھکانے بنا رکھے ہیں نشانہ بنایا گیا -

خبروں میں بتایا گیا ہے کہ ان حملوں میں داعش کو بھاری جانی اور مالی نقصان پہنچا اور ان کی متعدد گاڑیاں تباہ ہوگئیں - نامعلوم جنگی طیاروں نے سرت شہر کے مرکز اور اس کے مضافات میں بن جواد کالونی میں بھی داعش کے ٹھکانوں پر حملے کئے ہیں -

داعش نے لیبیا کے سرت شہر اور اس کے مضافات کے علاقوں پر قبضہ کر رکھا ہے - داعش نے چند مہینے قبل ساحلی شہر سرت پر قبضہ کرکے اس کو اپنی حکومت کا دارالخلافہ قرار دیا ہے اور لیبیا کے دیگر علاقوں میں اپنی پوزیشن مستحکم بنانے کے مرکز کے طور پر اس شہر کو استعمال کر رہا ہے -