SAHAR

کویت کے وزیر خارجہ نے اقوام متحدہ کی درخواست پر یمن امن مذاکرات کی مدت ایک ہفتے تک بڑھا دیئے جانے کی تصدیق کر دی ہے

کویت کے وزیرخارجہ نے ایک بیان میں اس خبر کی تصدیق کرتے ہوئے کہا ہے کہ یمن کی مستعفی حکومت اورتحریک انصاراللہ کے وفود کو سات اگست تک امن مذاکرات میں کسی نتیجے تک پہنچنے کا موقع دیا گیا ہے- 

یمن کے قومی وفود کی جانب سے مذاکرات ترک کرنے کے  فیصلے کے بعد یہ مذاکرات سنیچر کو کسی نتیجے پر پہنچے بغیر ختم ہونے والے تھے لیکن یمن کے امورمیں اقوام متحدہ کے نمائندے اسماعیل ولد شیخ الاحمد نے فریقین سے ملاقات کے بعد ان مذاکرات کی مدت مزید ایک ہفتے تک بڑھا دیئے جانے کی خبردی تھی-

یمن میں قیام امن کے لئے ریاض وفد اور یمنی فریقوں کے درمیان مذاکرات کا سلسلہ اپریل سے کویت میں جاری ہے-

دوسری طرف انقلاب یمن کی اعلی کمیٹی نے عوام اور سیاسی پارٹیوں سے اپیل کی ہے کہ وہ یمن کی سیاسی قوتوں کے درمیان حالیہ سمجھوتے کی حمایت میں صنعا کے السبعین اسکوائر پر بڑے پیمانے پر ریلی نکالیں -