آل خلیفہ کے سیکورٹی اہلکاروں کا بحرینی عوام پر ایک بار پھر حملہ
بحرین میں آل خلیفہ حکومت کے سیکورٹی اہلکاروں نے منگل کی رات الدراز کے علاقے میں احتجاجی مظاہرین پر حملہ کیا ہے۔
پریس ٹی وی کی رپورٹ کے مطابق بحرین کے احتجاجی مظاہرین نے سعودی عرب کے ممتاز عالم دین شیخ باقر النمر کو پھانسی کی سزا دیئے جانے کے ایک سال پورا ہونے کی مناسبت سے، بحرین کے ممتاز شیعہ عالم دین آیت اللہ شیخ عیسی قاسم کے گھر کے سامنے اجتماع کیا اور شیخ باقر النمر کے راستے کو جاری رکھنے پر زور دیا ۔
سعودی عرب کے اہل تشیع بھی آئندہ جمعے سے ایک ہفتے تک شیخ باقر النمر کی شہادت کی پہلی برسی کے موقع پر احتجاجی مظاہرے کریں گے اور ان کے راستے کو جاری رکھنے پر زور دیں گے۔ آل خلیفہ کے سیکورٹی اہلکاروں کے تشدد آمیز اقدامات کے باوجود بحرینی عوام بدستور شیخ عیسی قاسم کے گھر کے سامنے دھرنا جاری رکھے ہوئے ہیں۔
آل خلیفہ کے سیکورٹی اہلکاروں نے کئی بار دھرنا دینے والوں پر حملہ اور ان پر تشدد کر کے انھیں منتشر کرنے کی کوشش کی ہے لیکن وہ اپنی ان کوششوں میں کامیاب نہیں ہو سکے ہیں۔ درایں اثنا سیکڑوں بحرینی عوام نے بدھ کی صبح آیت اللہ عیسی قاسم کے گھر کے سامنے فدا اسکوائر میں نماز فجر ادا کی۔
