SAHAR

یمنی فوج نے ملک کے شمالی علاقوں میں سعودی اتحادی فوجیوں کے ٹھکانوں پر حملہ کرکے دسیوں غاصب فوجیوں کو ہلاک اور زخمی کردیاہے-

المسیرہ ٹیلی ویژن چینل نے خبردی ہے کہ یمنی فوج نے شمال کے سرحدی علاقوں میں سعودی عرب کے اتحادی فوجیوں پر گھات لگا کر حملہ کیا جس کے نتیجے میں دسیوں سعودی اتحادی ہلاک اور زخمی ہوگئے- یمنی فوج کے توپخانوں نے بھی  جنوبی صوبے تعزمیں کئی علاقوں میں سعودی فوجی اتحادیوں کے ٹھکانوں پر شدید گولہ باری کی جس میں متعدد غاصب فوجی مارے گئے ہیں - پریس ٹی وی نے بھی خبردی ہے کہ سعودی عرب کے سرحدی علاقے نجران میں بھی یمنی فوج نے ایک جھڑپ کے دوران کم سے کم دو سعودی فوجیوں کو  ہلاک کردیا ہے -

دریں اثنا سعودی عرب کے لڑاکا طیاروں نے اپنے وحشیانہ حملے جاری رکھتے ہوئے ایک بار پھر یمن کے متعدد علاقوں پر بمباری کی ہے - سعودی لڑاکاطیاروں نے صوبہ تعز کے شہر المخا کے رہائشی علاقوں پر حملے کئے جن میں متعدد یمنی شہری شہید اور زخمی ہوگئے - سعودی لڑاکا طیاروں نے صوبہ تعز کے ہی ذباب شہر پر بھی بمباری کی ہے تاہم اس بمباری میں ہونے والے جانی نقصان کی کوئی اطلاع موصول نہیں ہوسکی ہے -