غزہ میں اسرائیلی جرائم کی تحقیقات کا مطالبہ
Apr ۰۴, ۲۰۱۸ ۱۵:۱۹ Asia/Tehran
عرب لیگ نے غزہ میں اسرائیل کے جرائم کی تحقیقات کے لیے عالمی کمیٹی کے قیام کا مطالبہ کیا ہے۔
قاہرہ میں عرب لیگ کے ہنگامی اجلاس میں غزہ میں یوم الارض اور واپسی مارچ پر اسرائیل کے وحشیانہ حملے کے بعد پیدا ہونے والی صورت حال کا جائزہ لیا گیا۔
واپسی مارچ پر اسرائیل کے وحشیانہ حملے کے بعد فلسطینی اتھارٹی نے عرب لیگ کا ہنگامی اجلاس بلانے کا مطالبہ کیا تھا۔
قابل ذکر ہے کہ ہزاروں فلسطینیوں نے گزشتہ جمعے کو یوم الارض کے موقع پر اپنے آبائی وطن واپسی کے حق میں وسیع پیمانے مظاہرے کیے تھے جس پر غاصب صیہونی فوجیوں نے حملہ کر دیا تھا۔ اسرائیلی بربریت میں سترہ فلسطینی شہید اور ڈیڑھ ہزار کے قریب زخمی ہو گئے تھے۔
