انڈونیشیا میں سیلاب اور لینڈ سلائیڈنگ
انڈونیشیا میں طوفانی بارشوں، سیلاب اور لینڈ سلائیڈنگ سے 44 افراد ہلاک اور متعدد زخمی ہوگئے۔
اطلاعات کے مطابق مشرقی صوبے میں مسلسل ہونے والی طوفانی بارشوں نے سیلاب کی شکل اختیار کرلی جس نے ہر طرف تباہی مچادی ہے۔
ریسکیو اداروں نے امدادی کاموں کا آغاز کردیا ہے اب تک بارشوں، لینڈ سلائیڈنگ اور سیلاب سے ہلاکتوں کی تعداد 44 ہوگئی جب کہ فلوریس جزیرے کے مشرقی علاقے میں پل اور سڑکیں تباہ ہونے سے ٹریفک کا نظام درہم برہم ہوگیا۔
امدادی کاموں کے دوران لاشیں ملنے کا سلسلہ جاری ہے جس کے باعث ہلاکتوں میں اضافے کا خدشہ ہے۔
اسپتالوں میں 50 سے زائد زخمیوں کو لایا گیا ہے جن میں سے اکثریت کو ابتدائی طبی امداد کے بعد گھر جانے کی اجازت دیدی گئی جبکہ 9 زخمیوں کی حالت نازک ہے۔ اسپتالوں میں ایمرجنسی نافذ کردی گئی ہے۔
محکمہ موسمیات کا کہنا ہے کہ بارشوں اور خراب موسم کے پیش نظر سمندر کی طرف جانے پر پابندی عائد کردی گئی ہے، جب کہ لینڈ سلائیڈنگ کی وجہ سے سیلابی ریلے میں مٹی شامل ہوگئی ہے شہریوں کو بلا ضرورت گھروں سے نہ نکلنے کی ہدایت کی گئی ہے۔
