سعودی عرب کے ملک خالد ایر بیس پر ڈرون حملہ
یمنی فوج اور عوامی رضاکار فورس نے سعودی عرب کے ملک خالد ایر بیس پر ڈرون حملہ کیا ہے۔
یمن کی مسلح افواج کے ترجمان یحیی سریع نے جمعرات کو اعلان کیا ہے کہ سعودی عرب کے خمیس مشیط علاقے میں ملک خالد ایئربیس میں ایک اہم فوجی سائٹ کو قاصف کے ٹو ڈرون طیارے سے نشانہ بنایا گیا۔
یمن کی مسلح افواج کے ترجمان نے زور دے کر کہا ہے کہ ملک خالد ایئربیس میں فوجی اہداف پر ہونے والا حملہ پوری طرح کامیاب رہا ہے۔
یحیی سریع نے کہا کہ سعودی عرب کی فوجی سائٹوں پر یمن کی کارروائی ، اس کا قانونی حق اورسعودی جارحیت اور محاصرے کا جواب ہے ۔
اس سے قبل یمنی حکومت کے وزیردفاع محمد ناصر العاطفی نے زور دے کر کہا تھا کہ اگر سعودی اتحاد یمن کے خلاف جارحیت کی حماقت جاری رکھے گا تو دوسری حکمت عملی اختیار کی جائے گی۔
یمنی فوج اور رضاکار فورس نے حالیہ مہینوں میں جنوبی سعودی عرب میں واقع جیزان اور ابہا ہوائی اڈوں اور ملک خالد ایئربیس کو کئی بار اپنے ڈرون اور میزائلی حملوں کا نشانہ بنایا ہے ۔
جیزان اور ابہا ہوئی اڈے اور ملک خالد ایئربیس سے ہی جارح سعودی اتحاد یمن پر حملوں کے لئے مدد اور ایندھن حاصل کرتا ہے۔
یمن گذشتہ چھے برس سے جارح سعودی اتحاد کے حملوں اور سنگین بحری ، بری اور فضائی محاصرے کا شکار ہے جس کے باعث اس ملک کو غذائی اشیاء اور دواؤں کی شدید قلت کا سامنا ہے۔
