اسرائیل کے 70 کلومیٹر اندر، 40 منٹ تک حزب اللہ کا ڈرون طیارہ پرواز کرتا رہا+ ویڈیوز
مقبوضہ فلسطین میں در انداز کرنے والے ایک ڈرون طیارے کو انٹرسپٹ کرنے میں صیہونی فوج کی ناکامی کے بعد حزب اللہ لبنان نے اس بارے میں ایک بیان جاری کیا ہے۔
فارس نیوز ایجنسی کی رپورٹ کے مطابق حزب اللہ لبنان نے جمعے کی شام، شمالی مقبوضہ فلسطین میں سیکورٹی واقعے پر ایک بیان جاری کیا ہے۔
حزب اللہ لبنان نے اس بارے میں جاری بیان میں کہا کہ اسلامی استقامت نے آج بتاریخ 18/02/2022 بروز جمعہ حسان نامی ڈرون طیارہ مقبوضہ فلسطین بھیجا۔ حسان ڈرون طیارہ 40 منٹ تک مقبوضہ علاقے میں پرواز کرتا رہا اور ٹارگٹ والے علاقے میں اطلاعات جمع کرنے میں کامیاب رہا۔
اس بیان میں آیا ہے کہ جاسوسی کا یہ عمل مقبوضہ فلسطین کے شمالی علاقے میں 70 کلومیٹر تک جاری رہا۔ ڈرون طیارے کو سرنگوں کرنے کی دشمن کی متعدد کوششوں کے باوجود ڈرون طیارہ صحیح و سالم مقبوضہ علاقے سے واپس آ گیا۔
حزب اللہ لبنان کا کہنا ہے کہ ڈرون طیارے نے اپنے مد نظر ہدف کو حاصل کر لیا اور دشمنوں کے اقدامات کے اثر کے بغیر اپنی ذمہ داریوں پر عمل کیا۔
دوسری جانب عبری میڈیا نے جمعے کی شام خبر دی تھی کہ مقبوضہ فلسطین کے شمالی علاقے جلیل علیا اور مقبوضہ جولان میں خطرے کا سائرن دو بار بجا۔
