کابل کے ایک گرودوارے میں دھماکے، کئی ہلاک و زخمی
افغانستان کے دارالحکومت کابل میں آج صبح یکے بعد دیگرے کئی دھماکے ہوئے۔
ہمارے نمائندے کی رپورٹ کے مطابق آج صبح افغانستان کے دارالحکومت کابل کے اہم سکیورٹی زون میں کئی دھماکے ہوئے تاہم اس بار دھماکوں میں سکھوں کے گرودوارے کو نشانہ بنایا گیا۔ کابل کے علاقے کارتی پروان کے ایک گرودوارے میں دھماکے کے نتیجے میں کم از کم دو افراد ہلاک جبکہ سات زخمی ہوگئے۔
خبر ایجنسی کے مطابق دھماکہ کابل کے علاقے کارتی پروان کے ایک گرودوارے میں آج صبح ہوا۔ گرودوارے کے انتظامی عہدیدار گرنام سنگھ نے خبر ایجنسی سے گفتگو کرتے ہوئے بتایا کہ دھماکے کے وقت گردوارے میں تقریباً 30 افراد موجود تھے۔
گرنام سنگھ کا کہنا ہے کہ طالبان ہمیں گرودوارے میں داخلے کی اجازت نہیں دے رہے اور ہمیں گرودوارے کے اندر کی صورتحال سے متعلق فی الحال کچھ علم نہیں ہے۔ دوسری جانب گرودوارے میں دھماکے سے متعلق طالبان حکام کی جانب سے تاحال کوئی بیان جاری نہیں کیا گیا ہے۔
