غرب اردن میں صیہونی فوجی چھاؤنی میں دھماکہ
غرب اردن کے شمال میں واقع جنین کے قریب صیہونی فوجی چھاؤنی میں دھماکہ کی خبریں موصول ہوئی ہیں اس درمیان فلسطینی مجاہدین نے بھی جوابی کارروائی کرتے ہوئے صیہونی فوجیوں پر حملہ کیا ہے ۔
سحر نیوز/ عالم اسلام: ایران پریس کی رپورٹ کے مطابق اسرائیلی ریڈیو نے رپورٹ دی ہے کہ غرب اردن کے شمال میں واقع جنین کے قریب صیہونی حکومت کی فوجی چھاؤنی میں دھماکہ ہوا ہے۔
صیہونی حکومت کے ریڈیو نے دعوی کیا ہے کہ اس دھماکے میں کوئی جانی نقصان نہیں ہوا ہے اور حادثے کی تحقیقات کی جا رہی ہیں۔
اس رپورٹ کے مطابق اس دھماکے کے نتیجے میں صیہونی فوجی چھاؤنی کی دیواروں میں دراڑیں پڑگئی ہیں اس درمیان اطلاعات ہیں کہ فلسطینی مزاحمتی گروہوں نے غاصب صیہونی ریاست کے خلاف مغربی کنارے اور قدس شریف میں گزشتہ چوبیس گھنٹے میں پندرہ آپریشن انجام دیئے ہیں۔
فلسطین الیوم کی رپورٹ کے مطابق فلسطینی مزاحمتی گروہوں نے جنین، طوباس، الخلیل، قدس شریف، رام اللہ، قلقیلیہ اور بیت لحم کے علاقوں میں غاصب صیہونی فوجیوں کے خلاف مختلف آپریشن انجام دئیے ہیں اور ان پر فائرنگ کے واقعات کی خبریں ہیں ۔
فلسطینی مزاحمتی گروہوں نے رام اللہ کے علاقے قلندیا میں صیہونی فوجی چیک پوسٹوں پر بارودی مواد سے حملہ کیا۔ فلسطینی مجاہدین نے نابلس کے شمال میں بھی صیہونی فوجیوں کی ایک چیک پوسٹ پر دستی بم سے حملہ کیا ہے۔
فلسطینیوں نے صیہونی حکومت کے ساتھ کسی بھی قسم کے مذاکرات کو مسترد کرتے ہوئے صیہونی جارحیت کے جواب میں ہتھیار اٹھا کر جواب دینے کا فیصلہ کر لیا ہے۔
فلسطینی مزاحمتی تنظیموں نے، صیہونی فوج اور مسلح صیہونیوں کی جانب سے بڑھتی جارحیت اور فلسطینی خواتین اور بچوں کو نشانہ بنائے جانے کے جواب میں، اپنی جوابی اور انتقامی کارروائیاں تیز کر دی ہیں جس کے نتیجے میں غاصب صیہونی حکومت کے مقابلے میں طاقت کا توازن اب فلسطینی مجاہدین کے حق میں تبدیل ہوتا جا رہا ہے۔
رپورٹوں سے پتہ چلتا ہے کہ غرب اردن میں فلسطینیوں کی تحریک استقامت کے مجاہد سپاہی، اپنی جان فشانی اور موثر و جراتمندانہ منھ توڑجوابی کارروائیاں انجام دے کر غاصب صیہونی حکومت کی جارح فوج کے خوف و ہراس اور ڈراؤنے خواب میں تبدیل ہو گئے ہیں۔
یاد رہے کہ اس سے پہلے صرف غزہ اورمقبوضہ فلسطین کے جنوبی علاقوں میں صیہونیوں کو فلسطینی مزاحمت کا سامنا کرنا پڑتا تھا لیکن اب مغربی کنارے اورمشرقی فلسطینی علاقوں کے مختلف علاقے فلسطینی جوانوں کے لئے صیہونیوں کے شکارکرنے کا اہم علاقہ بن گئے ہیں۔
