جماعتِ اسلامی پاکستان کی ایران کے حق میں ریلیوں کی اپیل، جمعہ کو یومِ سوگ منانے کا اعلان
جماعتِ اسلامی پاکستان نے ایران کے ساتھ اظہارِ یکجہتی کے لیے ملک بھر میں احتجاجی مظاہروں کی اپیل کرتے ہوئے جمعہ کے دن کو یومِ سوگ قرار دینے کا اعلان کیا ہے۔
سحرنیوز/پاکستان: جماعتِ اسلامی کے امیر حافظ نعیم الرحمان نے اسلام آباد میں ایک پریس کانفرنس کے دوران امریکہ اور اسرائیل کی جانب سے ایران کے خلاف کارروائیوں کی مذمت کی اور رہبرِ انقلاب اسلامی آیت اللہ العظمیٰ سید علی خامنہ ای کی شہادت پر تعزیت پیش کی ہے۔
پریس کانفرنس کے بعد وہ اسلام آباد میں ایرانی سفارت خانے گئے جہاں انہوں نے پاکستان میں ایران کے سفیر رضا امیری مقدم سے ملاقات کی اور آیت اللہ خامنہ ای کی یاد میں قائم تعزیتی رجسٹر میں اپنے تاثرات بھی درج کیے۔
حافظ نعیم الرحمان نے اعلان کیا کہ جماعتِ اسلامی جمعہ کے روز پاکستان کے مختلف شہروں میں بڑے مظاہرے کرے گی تاکہ ایران کے ساتھ یکجہتی اور امریکہ و اسرائیل کی کارروائیوں کے خلاف احتجاج کیا جا سکے۔
دوسری جانب پاکستان کی 15 سنی جماعتوں اور تنظیموں کے اتحاد نے، جس کی قیادت سابق وفاقی وزیر برائے مذہبی امور علامہ سید حامد سعید کاظمی کر رہے ہیں، جمعہ 6 مارچ کو ایران کے عوام کے ساتھ اظہارِ یکجہتی اور آیت اللہ خامنہ ای کی شہادت کے سوگ میں یومِ عزا قرار دیا ہے۔
اسی طرح فیڈریشن آف علما و دانشوران پاکستان کے سربراہ پیر احمد عمران نقشبندی نے بھی ایک بیان میں امریکہ اور اسرائیل کی کارروائیوں کی مذمت کرتے ہوئے جمعہ کو ایران کے ساتھ یکجہتی کا دن منانے کا اعلان کیا ہے۔
ہمیں فالو کریں:
Follow us: Facebook, X, instagram, tiktok whatsapp channel
