سعودی عرب، دوستانہ میچ میں میسی نے رونالڈو کو ہرا دیا
سعودی عرب کے دارالحکومت ریاض میں کھیلے گئے دنیا کے معروف فٹبالروں کے دوستانہ میچ میں میسی کی ٹیم نے رونالڈو کی ٹیم کو ایک گول سے شکست دے دی۔
سحر نیوز/عالم اسلام: غیر ملکی ذرائع کے مطابق سعودی عرب کے ملک فہد انٹرنیشنل اسٹیڈیم میں کھیلے گئے میچ میں اسٹار پلیئر لیونل میسی، کرسٹیانو رونالڈو، نیمار اور کلیان ایمباپے سمیت دیگر معروف کھلاڑی ایکشن میں نظر آئے۔
دوستانہ میچ میں کرسٹیانو رونالڈو نے دو گول ضرور داغے مگر ان کی ٹیم جیت حاصل کرنے میں ناکام رہی اور ان کے حریف لیونل میسی کی ٹیم کو کامیابی حاصل ہوئی۔ دوسرے ہاف میں دلچسپ مقابلے کے بعد لیونل میسی کی ٹیم پی ایس جی نے ریاض آل اسٹار الیون کو شکست دے دی۔
دوستانہ میچ میں ریاض آل اسٹار الیون کے کرسٹیانو رونالڈو نے دو گول جبکہ جینگ ہیون اور ٹیلسکا نے ایک ایک گول کیا۔اسی طرح پی ایس جی کی جانب سے کپتان لیونل میسی، ایمباپے، مارکوینوس، سرجیو ریموس اور ایکٹیکے نے ایک ایک گول کرکے اپنی ٹیم کو کامیابی دلائی۔
واضح رہے کہ نمائشی میچ میں مزید دلچسپی پیدا کرنے اور اُسے یادگار بنانے کیلئے ایک خصوصی ٹکٹ کی نیلامی بھی کی گئی تھی جسے ایک سعودی تاجر مشرف الغامدی نے چھبیس لاکھ ڈالر میں خریدا لیا تھا۔
