صیہونی فوجی دسیوں بکتربند گاڑیوں کے ساتھ شام کے صوبہ درعا میں داخل
صیہونی فوجی دسیوں بکتربند گاڑیوں کے ساتھ شام کے صوبہ درعا کے مختلف علاقوں میں داخل ہوگئے ہیں۔
سحر نیوز/ عالم اسلام: میڈیا ذرائع کے مطابق صیہونی حکومت کی فوج ، گذشتہ روز شام کی مختلف فوجی تنصیبات پر فضائی بمباری کے بعد بکتربند گاڑیوں میں صوبہ درعا کے شہر "نوی" میں داخل ہونے کے علاوہ الجبلیہ ڈیم کے اطراف واقع جنگلوں تک آگے بڑھ گئے ہيں۔ جولانی حکومت نے صیہونیوں کے ان اقدامات پر مکمل خاموشی اختیار کر رکھی ہے جس کے بعد علاقے کے عوام نے صیہونی فوجیوں کے مقابلے کے لیے تدبیریں اپنانا شروع کردی ہیں۔ صیہونی حکومت کے اس اقدام کے خلاف شامی عوام کھڑے ہوئے ہيں تاہم اسرائیلی فوجیوں نے انھیں کچلنے کے لئے جموع اور جابیہ پہاڑیوں پر گولہ باری کی ہے۔ اطلاعات کے مطابق کم از کم چار سو صیہونی فوجی صوبہ درعا میں داخل ہوگئے ہیں۔ رپورٹ کے مطابق صیہونیوں کی مسلسل جارحیت اور شام پر مسلط گروہ کی خاموشی سے پریشان عوام، مختلف سطح پر احتجاج کر رہے ہیں۔اطلاعات ہیں کہ شام کے درعا صوبے کی مسجدوں سے صیہونی فوجیوں کے مقابلے کے لیےاٹھ کھڑے ہونے اور عوامی تحریک شروع کرنے کی اپیل کی جا رہی ہے۔
