ترکیہ: شرح پیدائش میں شدید کمی پر صدر اردوغان کا اظہارِ تشویش
ترکیہ کے صدر رجب طیب اردوغان نے ملک میں شرح پیدائش میں شدید کمی پر تشویش کا اظہار کرتے ہوئے ہنگامی اقدامات کی ضرورت پر زور دیا ہے۔
سحرنیوز/عالم اسلام: میڈیا رپورٹوں کے مطابق ترکیہ کے صدر رجب طیب اردوغان نے ملک میں شرح پیدائش میں شدید کمی پر تشویش کا اطہار کرتے ہوئے کہا ہے کہ ترکیہ میں خاندانی ادارے کو درپیش بڑھتے ہوئے چیلنج کے پیش نظر ہنگامی اقدامات کی ضرورت ہے۔
ترکیہ کے دارالحکومت انقرہ میں منعقدہ فیملی اینڈ کلچر آرٹس سمپوزیم سے خطاب کرتے ہوئے صدر اردوغان نے کہا کہ ترکیہ ایسے دور میں خاندان کے ادارے کی حفاظت کر رہا ہے جب عالمی سرمایہ داری نئے نئے محاذ کھول رہی ہے اور ثقافتی استعمار اور ڈیجیٹل محاصرہ دنیا بھر میں تیزی سے اپنے قدم جما رہا ہے۔
انہوں نے کہا کہ "اس وقت ہم ایک آفت کا سامنا کر رہے ہیں کیونکہ سرکاری اعداد و شمار کے مطابق ملک میں شرح پیدائش گھٹ کر گزشتہ سال ایک اعشاریہ 48 رہ گئی ہے۔" ان کا کہنا تھا کہ "یہ کمی ہماری آنے والی نسلوں کے لئے ایک خطرے کی گھنٹی ہے اور ملک کے مستقبل کی فکر کرنے والا کوئی شخص اس معاملے سے لا تعلق نہیں رہ سکتا۔"
