SAHAR

سعودی جارحیت کے خلاف ملک کے دفاع کا سلسلہ جاری رکھتے ہوئے یمنی فوج اور عوامی رضاکاروں نے شمال مغربی یمن میں دشمن کے اسلحے کے ایک ذخیرے کو ضبط کر لیا ہے۔

صنعا میں عسکری ذرائع نے بتایا ہے کہ یہ اسلحہ سعودی ایجنٹوں نے صوبہ حجہ کے شہر عبس میں ایک مقام پر لا کر چھپایا تھا لیکن یمنی فوج اور عوامی رضاکار فورس کے جوانوں نے اس کا پتہ لگانے کے بعد تمام ہتھیار اپنی تحویل میں لے لیے۔

اس ڈپو سے مختلف اقسام کی سیکڑوں بارودی سرنگیں، متعدد آر پی جی گنیں، ٹینک شکن راکٹ لانچر اور بہت سے دوسرے خودکار ہتھیار برآمد ہوئے ہیں۔ یمنی فوج اور عوامی رضاکار فورس کے جوانوں نے ہفتے کی شب سعودی عرب کے سرحدی علاقے جیزان میں واقع عین الحارہ نامی فوجی اڈے پر راکٹوں سے حملہ کیا تھا جس کے نتیجے میں سعودی فوج کی متعدد گاڑیاں اور ہتھیار جل کر راکھ ہو گئے۔

ایک اور اطلاع کے مطابق یمنی فوج کے جوانوں نے ملک کے جنوبی صوبے ضالع کے شہر دمت کو شدید لڑائی کے بعد سعودی ایجنٹوں کے قبضے سے آزاد کرا لیا ہے۔ اس سے پہلے یمنی فوج اور عوامی رضاکار فورس کے جوانوں نے مخا شہر کے ساحلوں کے قریب حملہ کر کے سعودی فوج کی چار جنگی کشتیوں کو غرق کر دیا تھا۔