پلاسکو سانحہ پر رہبر انقلاب اسلامی کا تعزیتی پیغام
رہبرانقلاب اسلامی نے تہران کے پلاسکو تجارتی کمپلیکس میں آتشزدگی کے سانحے کا شکار ہونے والے افراد کے اہل خاندان کو تعزیت پیش کرتے ہوئے سانحہ متاثرین کی ہرممکن مدد کا حکم دیا ہے
رہبرانقلاب اسلامی آیت اللہ العظمی خامنہ ای نے اپنے تعزیتی پیغام میں تہران کے مرکز میں واقع قدیم تجارتی کمپلیکس میں پیش آنے والے سانحے میں اپنی جان کی بازی لگانے والے فائربریگیڈ کے عملے کی انتھک کوششوں کو سراہتے ہوئے فرمایا کہ فائر بریگیڈ کے عملے نے تجارتی کمپلیکس کے سانحے میں اپنی جان کو خطرے میں ڈال کر لوگوں کی جان بچانے کے لئے جس ایثار و قربانی کا مظاہرہ کیا اور خود کو ایک سخت آزمائش و امتحان سے دوچار کیا ہے اس سے دل تعریف و تمجید اور دکھ و تشویش سے بھر گیا ہے -
رہبرانقلاب اسلامی نے تاکید کے ساتھ فرمایا کہ اس وقت تمام کوششیں سانحے میں پھنسے ہوئے باقی لوگوں کی جان بچانے پر مرکوز کرنا چاہئے اور سانحے کی تحقیقات کا کام بعد کا مسئلہ ہے - آپ نے تمام حکام سے مطالبہ کیا ہے کہ جس طرح انھوں نے ان چند گھنٹوں میں جہادی پیمانے پر کام کیا ہے اسی طرح اسے جاری رکھیں اور اپنے فرض کو ہربات پرمقدم رکھیں اور ملبے میں پھنسے ہوئے باقی افراد کی جان بچانے کی کوششیں تیزکردیں-
حجت الاسلام سید رضا تقوی نے جمعے کی صبح رہبرانقلاب اسلامی کی نمائندگی میں تہران کے دو اسپتالوں میں جاکر حادثے میں زخمی ہوجانے والے فائربریگیڈ کے محکمے کے کارکنوں کی عیادت کی اور زخمیوں کو رہبرانقلاب اسلامی کا سلام پہنچایا اور ان کی فداکاریوں کو خراج تحسین پیش کیا -
