کامیابیوں نے پاک فوج کو دنیا کی بہترین فوج بنا دیا: جنرل راحیل شریف
پاکستان کے آرمی چیف جنرل راحیل شریف نے کہا ہے کہ پاک فوج کسی بھی جارحیت کا جواب دینے کے لیے ہمہ وقت تیار ہے۔ کامیابیوں نے پاک فوج کو دنیا کی بہترین فوج بنا دیا۔
بہاولپور میں جاری جنگی مشقوں کی اختتامی تقریب سے خطاب کرتے ہوئے آرمی چیف نے کہا کہ تربیت کے معیار اور جنگی میدان میں کامیابیوں نے پاک فوج کو دنیا کی بہترین فوج بنا دیا۔ ان کا کہنا تھا کہ روایتی جنگ میں بھی پاک فوج کی تربیت کا معیاراعلی ہے۔
پاک فوج نے دہشت گردی کے خلاف جنگ میں بھی نمایاں کامیابیاں حاصل کیں۔ آرمی چیف نے مشقوں میں فوجی اہلکاروں کی جنگی مہارت ، مورال اور فٹنس کے معیار کی تعریف کرتے ہوئے کہا کہ ملکی سرحدوں کی حفاظت کے لیے ہمیں ہر وقت تیار رہنا ہو گا۔
واضح رہے کہ طالبان کے ساتھ حکومت پاکستان کے امن مذاکرات کی ناکامی، کراچی ایئرپورٹ اور پشاور میں آرمی پبلک اسکول پر دہشت گردانہ حملے کے بعد پاک فوج نے دہشت گردوں کے خلاف آپریشن ضرب عضب شروع کیا تھا جو اب تک جاری ہے۔
