کراچی میں پولیس مقابلہ 4 طالبان دہشت گرد ہلاک
Jul ۱۹, ۲۰۱۶ ۱۵:۲۹ Asia/Tehran
پاکستان کے سیکورٹی اداروں نے کراچی میں چار دہشت گردوں کو ہلاک کر دیا ہے۔
سیکورٹی ذرائع کے مطابق پولیس نے سہراب گوٹھ کے علاقے کوئٹہ ٹاؤن میں دہشت گردوں کی موجودگی کی خفیہ اطلاع پر چھاپہ مارا جس پر وہاں چھپے ملزمان نے پولیس ٹیم پر فائرنگ کر دی جس کے نتیجے میں دو پولیس اہلکار زخمی ہو گئے۔
پولیس اور دہشت گردوں میں فائرنگ کے تبادلے میں چار دہشت گرد ہلاک ہو گئے جن میں مقامی کمانڈر بھی شامل ہے۔
ہلاک ہونے والے دہشت گردوں کا تعلق پاکستانی طالبان سے بتایا جاتا ہے۔ دہشت گردوں کے قبضے سے متعدد ہینڈ گرینیڈ، کلاشنکوف اور پچیس کلوگرام دھماکا خیزمواد بھی برآمد کیا گیا ہے۔
پیر کے روز بھی کراچی میں دہشت گردوں کے خلاف خصوصی آپریشن کے دوران پانچ دہشت گردوں کو گرفتار کیا گیا تھا۔
