پاکستان کی جانب سے انسان دوستانہ امداد !
ایران کے سیلاب زدگان کے لیے پاکستانی بھائیوں کی جانب سے امداد کی پہلی کھیپ تہران پہنچ گئی۔
پاکستانی ذرائع نے بتایا ہے کہ پاکستان کا ایک ہوائی جہاز انسان دوستانہ امداد کی پہلی کھیپ لے کر بدھ کے روز ایران کے لئے روانہ ہوا تھا جو دیر رات تہران ہوائی اڈے پر پہنچ گیا ۔
اسلام آباد میں متعین ایران کے سفیر مہدی ہنردوست نے بھی اس خبر کی تصدیق کرتے ہوئے کہا تھا کہ پاکستان کی جانب سے امدادی سامان لے کر دوسرا جہاز جمعرات کے روز ایران روانہ ہو گا۔
انہوں نے بتایا کہ پاکستان کی جانب سے ارسال کیے جانے والے بتیس ٹن امدادی سامان میں پانچ سو خیمے، ڈھائی ہزار کمبل اور ابتدائی طبی امداد کا سامان شامل ہے۔
حکومت پاکستان نے امریکہ کی جانب سے ڈالی جانے والی رکاوٹوں کو ایرانی سیلاب زدگان کے لیے امداد کی روانگی میں تاخیر کی اہم وجہ قرار دیا ہے۔
اس سے پہلے پاکستان کی وزارت خارجہ نے اپنے بیان میں کہا تھا کہ وزیراعظم عمران خان کے حکم پر انسان دوستانہ امداد کی دو کھیپیں دو سی ون تھرٹی طیاروں کے ذریعے ایران روانہ کی جا رہی ہیں-
ایران کے شمالی، جنوبی اور جنوب مغربی صوبوں میں پچھلے دنوں شدید بارش اور سیلاب کے نتیجے میں کم سے کم ستر افراد جاں بحق ہو گئے جبکہ بڑے پیمانے پر مالی نقصانات ہوئے ہیں-
