SAHAR

پاکستان کے دفتر خارجہ کی ترجمان ڈاکٹر عائشہ فاروقی نے کہا ہے کہ دوست اور ہمسایہ ملک کی حثیت سے اسلام آباد امریکی پابندیوں کی وجہ سے کورونا وائرس کے مقابلے میں ایران کو پیش آنے والی مشکلات سے پوری طرح آگاہ ہے اور پابندیوں کے خاتمے کا مطالبہ کرتا ہے۔ 

انہوں نے کہا حکومت پاکستان ایران کے خلاف عائد امریکی پابندیوں کے خاتمے کے لیے سفارتی کوششوں اور صلاح و مشورے کا سلسلہ جاری رکھے گی۔ 

پاکستان کی وزارت خارجہ کی ترجمان نے کہا کہ کورونا کا بحران شروع ہوتے ہی وزیر اعظم عمران خان اور وزیر خارجہ شاہ محمود قریشی نیز دیگر پاکستانی عہدیداروں نے ایران کے خلاف پابندیوں کے خاتمے کے لیے رابطوں کا سلسلہ شروع کر دیا تھا اور یہ معاملہ اب امریکی کانگریس میں پہنچ گیا ہے۔ 

عائشہ فاروقی نے مزید کہا کہ ایران ہمارا دوست اور ہمسایہ ملک ہے اور کورونا وائرس کے خلاف مہم میں باہمی تعاون کا فروغ ایک فطری امر ہے تاکہ اس مہم میں حائل رکاوٹوں کو دور کیا جاسکے۔ 

پاکستان کی وزارت خارجہ کے ترجمان نے پاکستانی زائرین کی واپسی کے حوالے سے دونوں ملکوں کے درمیان جاری تعاون کی جانب اشارہ کرتے ہوئے کہا کہ ہم پاکستانی زائرین کو بہترین خدمات فراہم کرنے پر حکومت ایران کے شکر گزار ہیں۔ 

قابل ذکر ہے کہ پاکستان نے مختلف ملکوں میں پھنسے ہوئے اپنے شہریوں کی واپسی کے لیے پروازیں دوبارہ شروع کرنے کا اعلان کیا ہے۔ توقع ہے کہ ایران میں مقیم تقریبا تین لاکھ زائرین خصوصی پروازوں کے ذریعے جلد پاکستان واپس جا سکیں گے۔