جنرل فدوی: حالیہ جنگی صورتحال میں مخالف قوتوں کو بھاری نقصان پہنچا ہے
سپاہ پاسداران کی زمینی فورس کے کمانڈر کے مشیر جنرل علی فدوی نے کہا ہے کہ حالیہ جنگی صورتحال میں مخالف قوتوں کو بھاری نقصان پہنچا ہے
سحرنیوز/ایران: سپاہ پاسداران کی زمینی فورس کے کمانڈر کے مشیر جنرل علی فدوی نے کہا ہے کہ حالیہ جنگی صورتحال میں مخالف قوتوں کو بھاری نقصان پہنچا ہے اور خطے میں طاقت کا توازن مزاحمتی محاذ کے حق میں تبدیل ہوتا نظر آ رہا ہے۔ ان کے مطابق یہ تبدیلی مغربی ایشیا میں امریکہ کی کمزور ہوتی پوزیشن کی علامت ہے۔
اراک میں شہید جنرل محمد پاکپور کی یاد میں منعقدہ تقریب سے خطاب کرتے ہوئے انہوں نے کہا کہ امریکہ اور ایران کے درمیان براہ راست مقابلہ دو مواقع پر ہوا، ایک 12 روزہ جنگ کے دوران اور دوسرا موجودہ جاری جنگ میں۔
ان کا کہنا تھا کہ شہداء کی قربانیوں اور عوام کے حوصلے کے باعث امید ہے کہ رمضان کے بابرکت مہینے میں ایران کو بڑی کامیابی نصیب ہوگی اور دنیا امریکہ کی شکست کا مشاہدہ کرے گی۔
انہوں نے کہا کہ گزشتہ 47 برسوں میں ایران کے خلاف کارروائیاں زیادہ تر امریکہ کے اتحادی یا پراکسی گروہوں کے ذریعے کی جاتی تھیں، مگر اس بار امریکہ خود میدان میں آیا ہے اور ان کے بقول اسے خطے سے شکست کے ساتھ نکلنا پڑے گا۔ فدوی نے مزید کہا کہ آج امت مسلمہ پہلے سے زیادہ اپنی طاقت اور صلاحیتوں پر اعتماد رکھتی ہے اور ایران اپنی عزت اور خودمختاری کے تحفظ کے لیے ہر ممکن کوشش جاری رکھے گا۔
انہوں نے شہداء کی قربانیوں کا ذکر کرتے ہوئے کہا کہ اسلام کی بقا کے لیے تاریخ میں بڑی قربانیاں دی گئی ہیں اور اسی تسلسل میں اسلامی انقلاب کے تحفظ کے لیے بھی ہزاروں افراد نے جانیں قربان کی ہیں۔
ان کے مطابق اسلامی انقلاب کے بعد سے اب تک 2 لاکھ 30 ہزار سے زیادہ افراد شہید ہوئے جن میں تقریباً 40 ہزار پاسداران انقلاب کے افسران اور جوان شامل ہیں۔
تقریب کے دوران سردار محمد پاکپور کی زندگی اور خدمات کو بھی خراج عقیدت پیش کیا گیا۔ بتایا گیا کہ وہ 1961 میں صوبہ مرکزی کے ضلع خنداب کے گاؤں دہسد میں پیدا ہوئے اور کم عمری میں ہی جدوجہد کا آغاز کیا۔
وہ اسی سال جنگ رمضان میں امریکہ اور اسرائیل کے حملے میں شہید ہوئے۔
ان کی وصیت کے مطابق انہیں اپنے آبائی گاؤں میں اپنے شہید بھائی کے پہلو میں سپرد خاک کیا گیا۔
ہمیں فالو کریں:
Follow us: Facebook, X, instagram, tiktok whatsapp channel
