SAHAR

حکومت پاکستان نے سابق وزیراعظم نوازشریف کی وطن واپسی کے لئے برطانیہ کو خط لکھ دیا ہے

برطانوی اخبار فنانشل ٹائمز کی رپورٹ کے مطابق خط میں حکومت پاکستان نے برطانوی وزیر داخلہ پریتی پٹیل پر نواز شریف کو واپس بھیجنے کے لئے اپنے وسیع اختیارات استعمال کرنے پر زور دیا ہے۔

حکومت پاکستان کی جانب سے لکھے گئے خط میں عدالت کے گرفتاری کے وارنٹ کا بھی حوالہ دیا گیا ہے۔ نواز شریف ایک سال سے لندن میں مقیم ہیں اور وہ علاج کی غرض سے عبوری ضمانت پر رہا ہو کر پاکستان سے وہاں گئے تھے۔ اس درمیان نواز شریف کی عدالت میں طلبی کا اشتہار بھی اسلام آباد ہائی کورٹ میں آویزاں کر دیا گیا ہے-

حکومت نے عدالتی احکامات پر العزیزیہ اور ایون فیلڈ ریفرنسوں میں نواز شریف کی طلبی کے اشتہارات، جنگ اور ڈان میں شائع کرائے تھے- اشتہار میں کہا گیا ہے کہ نواز شریف چوبیس نومبر کو عدالت میں پیش ہوں۔