سید علی گیلانی کے انتقال پر پاکستان میں عام سوگ کا اعلان
ہندوستان کے زیر انتظام کشمیر کے سینئر حریت رہنما سید علی شاہ گیلانی کے انتقال پر پاکستان میں ایک دن کے سوگ کا اعلان کیا گیا ہے۔
ہمارے نمائندوں کی رپورٹوں کے مطابق کشمیر کے حریت رہنما سید علی شاہ گیلانی کے سوگ میں پاکستان بھر میں قومی پرچم سرنگوں کردیا گیا ہے۔
پاکستان کے وزیر اعظم عمران خان نے اس مناسبت سے ایک پیغام میں کہا ہے کہ " سید علی شاہ گیلانی کے یہ الفاظ ہمیں یاد رہیں گے کہ " ہم پاکستانی ہیں اور پاکستان ہمارا ہے "پاکستان کے وزیر اعظم عمران خان کے علاوہ صدر ڈاکٹر عارف علوی ، آرمی چیف جنرل قمر جاوید باجوہ ، وزیر خارجہ شاہ محمود قریشی، پاکستان کے سابق صدر اور پیپلز پارٹی کے شریک چیئرمین آصف علی زرداری اور مسلم لیگ نون کے صدر شہباز شریف اور دیگر رہنماؤں نے سید علی شاہ گیلانی کے انتقال پر تعزیت کے پیغامات جاری کئے ہیں۔
اسی کے ساتھ پاکستان کے زیر انتظام کشمیر میں سید علی شاہ گیلانی کے انتقال پر تین دن کے عام سوگ کا اعلان کیا گیا ہے۔
